ވަޒީފާގެ މަސައްކަތްތަކާއި ގޭތެރޭގެ ޒިންމާތަކުގެ ސަބަބުން އަވަދިނެތި އުޅެންޖެހޭ ބެލެނިވެރިންނަށް، ކުދިންނާއެކު ގިނަ ވަގުތު ހޭދަ ނުކުރެވުމަކީ ކަންބޮޑުވާ ކަމަކަށްވެ އެވެ.

ނަމަވެސް، ކުއްޖެއްގެ ނަފްސާނީ އަދި ޖަޒުބާތީ ރައްކާތެރިކަން ބިނާވަނީ ހަމައެކަނި ހޭދަކުރާ ވަގުތުގެ މިންވަރަކަށް ނޫނެވެ. އެއީ އެ ހޭދަކުރާ ވަގުތުގެ ފެންވަރަށް ބިނާވާ ކަމެކެވެ.

ކުޑަ ކުދިންގެ ހާއްސަ ނަފްސާނީ ޑޮކްޓަރަކު ވަނީ އަވަދިނެތި އުޅޭ ބެލެނިވެރިންނަށް ކުދިންގެ ޖަޒުބާތީ ރައްކާތެރިކަން ކަށަވަރު ކޮށްދިނުމަށްޓަކައި އަމަލު ކުރެވިދާނެ 7 މުހިންމު ފިޔަވަޅެއް ހިއްސާ ކުރައްވާފަ އެވެ.

1. ކޮންމެ ދުވަހަކުވެސް ސަމާސާ ކޮށްލާނެ "ހާއްސަ ވަގުތުކޮޅެއް" ހޯދުން

މުޅި ދުވަހު ކުއްޖާއާއެކު ނޫޅެވުނު ކަމުގައި ވިޔަސް، ކޮންމެ ދުވަހަކުވެސް 10-15 މިނެޓުގެ ވަގުތުކޮޅެއް ހަމައެކަނި ކުއްޖާއަށް ހާއްސަ ކުރާށެވެ. މި ވަގުތުކޮޅުގައި ފޯނު ފަދަ ތަކެތި ދުރުގައި ބެހެއްޓުމަށްފަހު، ކުއްޖާ ކުރަން ބޭނުންވާ ކަމަކަށް (އެކުގައި ކުޅުން ނުވަތަ ވާހަކަ ދެއްކުން) މުޅި ސަމާލުކަން ދީގެން ބައިވެރި ވާށެވެ.

2. ކުއްޖާގެ އިހުސާސްތައް ބަލައިގަތުން

ކުއްޖާ ދެރަވެ، ރުޅި އައިސް ނުވަތަ މާޔޫސްވާ ވަގުތުތަކުގައި "އެއީ ކުޑަ ކަމެކޭ" ބުނެ އެކަން އޮއްބާ ނުލާށެވެ. އޭގެ ބަދަލުގައި، ކުއްޖާއަށް އިހުސާސް ކުރެވޭ ގޮތް ބަލައިގަނެ، "އަހަރެންނަށް އެނގޭ ތި ދެރަވި ސަބަބު" ފަދަ އިބާރާތަކުން ކުއްޖާގެ އިހުސާސްތަކަށް އިހުތިރާމް ކުރާކަން އަންގައިދޭށެވެ.

3. ގަވާއިދުން ކުރާ ކަންކަން ގާއިމު ކުރުން

ކޮންމެ ދުވަހަކުވެސް އެއް ގަޑިއަކަށް ކުރެވޭ ކަންކަމުގެ ސަބަބުން ކުދިންނަށް ނަފްސާނީ ހަމަޖެހުން ލިބިގެންދެ އެވެ. އޮފީހުން އައިސް އެކުގައި ކެއުން، ނިދަންއުޅޭ ގަޑީގައި ވާހަކައެއް ކިޔައިދިނުން ނުވަތަ ހެނދުނު ސަލާމް ކޮށްލުން ފަދަ ކަންކަން ގަވާއިދުން ކުރުމަކީ ކުއްޖާއަށް ރައްކާތެރިކަން އިހުސާސް ކޮށްދޭނެ ކަމެކެވެ.

4. ލޯބިވާކަން ބަހާއި އަމަލުން ހާމަ ކުރުން

އަވަދިނެތި އުޅުނު ކަމުގައި ވިޔަސް، ދަރިފުޅު ދެކެ ލޯބިވާކަން ބުނެދިނުމާއި، އަތުގައި ހިފާލުން، ބައްދާލުން ފަދަ އަމަލުތަކުން ލޯބި ހާމަ ކުރާށެވެ. މީގެ ސަބަބުން ބެލެނިވެރިޔާ ކައިރީގައި ނެތް ވަގުތު ތަކުގައިވެސް ކުއްޖާއަށް އޭނާއަކީ ގަދަރު ކުރެވިފައިވާ، ލޯބި ލިބޭ ކުއްޖެއްކަން އިހުސާސްވާނެ އެވެ.

5. އަޑުއެހުން

ކުއްޖާ ވާހަކައެއް ދައްކަން ފެށުމުން، ކުރަންހުރި މަސައްކަތްތައް މަޑު ޖައްސާލުމަށްފަހު ކުއްޖާގެ ލޮލަށް ބަލަހައްޓައިގެން ހުރެ އަޑު އަހާށެވެ. ކުއްޖާ ދައްކާ ވާހަކައަށް ސަމާލުކަން ދިނުމުން، އެ ކުއްޖާގެ ހިޔާލުތަކާއި އިހުސާސްތަކަކީ މުހިންމު އެއްޗެއްކަން ކުއްޖާއަށް ގަބޫލު ކުރެވޭނެ އެވެ.

6. ކުދިންގެ އުމުރާ ގުޅޭ ޒިންމާތައް ދިނުން

ގޭތެރޭގެ ކުދިކުދި ކަންކަމުގައި (މިސާލަކަށް: ކާމޭޒު ތައްޔާރު ކުރުން ނުވަތަ ކުޅޭތަކެތި އަތުރާލުން) ކުއްޖާ ބައިވެރިކޮށް، އެކަމަށް ސާބަސް ދޭށެވެ. މީގެ ސަބަބުން ކުއްޖާގެ ނަފްސަށް އޮންނަ އިތުބާރު އިތުރުވެ، ހަށިގަނޑާއި ސިކުނޑި ވަރުގަދަވެ އެވެ.

7. އަމިއްލަ ނަފްސަށް އަޅާލުން

ބެލެނިވެރިން މާބޮޑަށް ސްޓްރެސްވެ، ވަރުބަލިވެފައި ހުންނަނަމަ ކުއްޖާއަށް އެދެވޭ ގޮތެއްގައި އަޅާނުލެވިދާނެ އެވެ. އެހެންކަމުން، ބެލެނިވެރިންގެ އަމިއްލަ ނަފްސާނީ އަދި ޖިސްމާނީ ދުޅަހެޔޮކަމަށް ވަގުތު ހޯދުމަކީ ކުއްޖާއަށްވެސް އޭގެ އެދެވޭ އަސަރު ކުރާނެ ކަމެކެވެ.

ހަނދާން ބަހައްޓާށެވެ. ކުއްޖާއަށް ބޭނުންވަނީ ފުރިހަމަ ބެލެނިވެރިންނެއް ނޫނެވެ. އޭގެ ބަދަލުގައި ބޭނުންވަނީ ކުއްޖާގެ އިހުސާސްތައް ދެނެގަނެ، އެކުގައިވާކަން އިހުސާސް ކޮށްދޭ އޯގާތެރި ބެލެނިވެރިންނެވެ.