އެމެރިކާއާއި އީރާނާ ދެމެދު މިހާރު ކުރިއަށްދާ ހަނގުރާމައިގެ ސަބަބުން ދުބާއީގައި ތާށިވެފައި ތިބި މީހުންނަށް އެހީވާން ބޮލީވުޑްގެ ތަރި ސޯޯނޫ ސޫދު ނިންމައިފި އެވެ.

އިންސްޓަގްރާމް މެދުވެރިކޮށް އިއްޔެ ސޯނޫ އާއްމުކުރި ވީޑިއޯއެއްގައި އޭނާ ބުނީ ދަތުރެއްގައި ދުބާއީއަށް ގޮސް ހަނގުރާމައިގެ ސަބަބުން ފްލައިޓް ކެންސަލްވެ ނާދެވިފައި ތިބި މީހުންނަށް އޭނާ އެހީވާނެ ކަމަށެވެ.

އެގޮތުން އެ ފަދަ މީހުން ދުބާއީގައި ތިބޭ މުއްދަތުގައި ތިބޭނެ ތަނެއް ބޭނުންނަމަ އޭނާއަށް އެކަން އެންގުމަށް ސޯނޫގެ ވީޑިއޯގައި އޭނާ އެދިފައިވެ އެވެ.

"މިވަގުތު އޮތް ހާލަތުގެ ސަބަބުން ދުބާއީގައި ތާށިވެފައި ތިބި މީހުންނަށް އަގަކާއި ނުލާ ހުރުމުގެ އިންތިޒާމު ހަމަޖެހޭނެ" ސޯނޫ ބުނެފައިވެ އެވެ.

އެގޮތުން އެކަމުގައި ވަކި ގައުމެއްގެ ރައްޔިތެއް ނުވަތަ ދީނެއްގެ މީހަކަށް ނުބަލާނެ ކަމަށާއި މިއީ އިންސާނިއްޔަތަށްޓަކައި އޭނާ ކޮށްދޭ ކަމަށް ސޯނޫ ބުންޏެވެ.

ސޯނޫގެ މި އިސްނެގުމާއެކު ގިނަ ބަޔަކު އަންނަނީ އޭނާއަށް ތައުރީފު ކުރަމުންނެވެ. މީގެ ކުރިން ވެސް އޭނާއަކީ އެފަދަ ކަންކަމުގައި އިސްނަގާ ތަރި އެކެވެ.