އެމެރިކާގެ ރައީސް ޑޮނަލްޑް ޓްރަމްޕްގެ "ބޯޑް އޮފް ޕީސް" އިން ޣައްޒާއަށް ކަނޑައެޅި ސުލްހައިގެ ޕްލޭން އިޒްރޭލުން ބަލައިނުގަންނަ ކަމަށާއި، ފަލަސްތީނުގެ ހަމާސް ޖަމާއަތުން މުޅިން ހަތިޔާރު ބަހައްޓަންދެން އިޒްރޭލްގެ ސިފައިން އެ ސަރަހައްދުން ފޭބުމަށް ދެކޮޅު ހަދާކަމަށް އެ ގައުމުގެ ބޮޑުވަޒީރު ބެންޖަމިން ނަތަންޔާހޫ ބުނެފި އެވެ.

އާދީއްތަ ދުވަހު ބޭއްވި ކެބިނެޓް ބައްދަލުވުމެއްގައި ނަތަންޔާހޫ ބުނީ، މިދިޔަ މަހު ހަމާސްއިން ތާއީދުކުރި 15 ނުކުތާގެ އެ ލިޔުމަށް އިޒްރޭލުން އިއުތިރާޒުކުރާ ކަމަށެވެ. އަދި ހަމާސްއިން ހަގީގީ މާނައިގައި ހަތިޔާރު އުފުލުން ހުއްޓާލައި ހަތިޔާރު ބަހައްޓަންދެން އިޒްރޭލްގެ ސިފައިން ފަހަތަށް ނުޖެހޭނެ ކަމަށާއި، އިޒްރޭލްގެ ސިފައިންނާއި ރައްޔިތުންނަށް އޮތް ނުރައްކާތައް ނައްތާލުމުގެ މަސައްކަތް ހުއްޓުމެއް ނެތި ކުރިއަށް ގެންދާނެ ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން، މި މައްސަލައިގައި އެމެރިކާއާއެކު މަޝްވަރާ ކުރަމުންދާ ކަމަށާއި، އެމެރިކާއިން ހުށަހަޅާ ކަންތައްތަކުގެ ތެރެއިން ބައެއް ކަންކަމަކީ ބަލައިގަނެވޭނެ ކަންކަން ކަމުގައި ވިޔަސް، އަނެއްބައި ކަންކަމަކީ އެއްގޮތަކަށް ވެސް ގަބޫލުކުރެވޭނެ ކަންކަން ނޫން ކަމަށް ނަތަންޔާހޫ ބުންޏެވެ. އަދި އިޒްރޭލުން ގަބޫލުނުކުރާ ކަންކަމުގައި ދޫނުދީ ހިފަހައްޓަން އެނގޭ ކަމަށް ވެސް އޭނާ ވަނީ ބުނެފަ އެވެ.

ނަތަންޔާހޫގެ މި ވާހަކަތަކާ ގުޅިގެން ވައިޓް ހައުސްއިން ނުވަތަ ހަމާސްއިން އަދި ރަސްމީކޮށް އެއްޗެއް ބުނެފައެއް ނުވެ އެވެ.

މިދިޔަ އޮކްޓޯބަރު މަހު ހަމާސްއާއެކު ހަމަލާ ބަދަލުކުރުން ހުއްޓާލުމަށް އެއްބަސްވި ނަމަވެސް، އިޒްރޭލުން ދަނީ ކޮންމެ ދުވަހަކު ކަހަލަ ގޮތަކަށް ޣައްޒާގެ އެކި ސަރަހައްދުތަކަށް ނުރައްކާތެރި ހަމަލާތައް ދެމުންނެވެ.

ޖުލައި މަހުގެ 30 ވަނަ ދުވަހު ޓްރަމްޕް އިއުލާން ކުރެއްވި ތާރީހީ އެއްބަސްވުމުގައި، ހަމާސްއާއި ޣައްޒާގައި ހަރަކާތްތެރިވާ އެހެނިހެން ހަތިޔާރު އެޅި ޖަމާއަތްތަކުން ފުރިހަމައަށް ހަތިޔާރު ބެހެއްޓުމަށް ގޮވާލާފައިވެ އެވެ.

ޓްރަމްޕް ސިފަކުރެއްވި ގޮތުގައި މިއީ ދާއިމީ ސުލްހައާއި ސަލާމަތަށް އެޅޭނެ ވަރަށް ބޮޑު ފިޔަވަޅެކެވެ. ނަމަވެސް، އެމެރިކާއިން އިސްވެ އޮވެ އުފައްދާފައިވާ ބޯޑް އޮފް ޕީސްގެ ޑައިރެކްޓަރު ނިކޮލައި މްލަޑެނޯވް އާއި ނަތަންޔާހޫއާ ދެމެދު ބޭއްވުނު ބައްދަލުވުމަކަށްފަހު، އެ ބޯޑުން މިދިޔަ ހަފުތާގައި ބުނެފައިވަނީ އިޒްރޭލު ސިފައިން ޣައްޒާއިން ފައިބާނީ ހަމާސްއިން ހަތިޔާރު ބަހައްޓައި ނިމުމުން ކަމަށެވެ.

ކެބިނެޓުގައި ވާހަކަދައްކަމުން ނަތަންޔާހޫ ބުނީ، އޭނާ ބޮޑުވަޒީރުކަމުގައި ހުރިހާ ހިނދަކު ފަލަސްތީނުގެ ދައުލަތެއް އުފެދުނަ ނުދޭނެ ކަމަށެވެ. އަދި އެމެރިކާގެ އެހީތެރިކަމާއެކު އެކުލަވާލާފައިވާ ޕްލޭންއަށް އިޒްރޭލުން ތަބާނުވާނެ ކަމަށް ވަނީ ބުނެފަ އެވެ.

މި 15 ނުކުތާގެ ޕްލޭންގައި ފުރަތަމަ މަރުހަލާގައި ހިމެނެނީ ހަމާސްގެ ބަރު ހަތިޔާރާއި، ހަތިޔާރު އުފައްދާ މަރުކަޒުތަކާއި، ގުދަންތަކުގެ އިތުރުން އެ ޖަމާއަތުން ބޭނުންކުރާ ބޮޑު ބިންގަރާސް ނެޓްވޯކް ނައްތާލުމަށެވެ.

ޣައްޒާގައި ހުރެ އަލްޖަޒީރާއާ ވާހަކަދައްކަވަމުން ހާނީ މަހުމޫދު ބުނި ގޮތުގައި، ނަތަންޔާހޫގެ މި ބަޔާނުގެ ސަބަބުން މި ހަމަނުޖެހުންތަކުން އަރައިގަނެވޭނެ މަގާމެދު ފަލަސްތީނުގެ ރައްޔިތުންގެ މެދުގައި ބޮޑެތި ސުވާލުތަކެއް ވަނީ އުފެދިފަ އެވެ. ޕްލޭން އެއްކޮށް ބަލައިނުގަތުމުން، އެކަމުގައި ހިމެނޭ ފިޔަވަޅުތައް ތަރުތީބުވެގެންދާނެ ގޮތާމެދު ޝައްކު އުފެދޭ ކަމަށް އޭނާ ފާހަގަކުރި އެވެ.

ހުޅަނގު އައްސޭރީގެ ބައިތުލްލަހަމްގައި ހުރެ އަލްޖަޒީރާގެ ނޫރު އޯޑޭ ރިޕޯޓްކުރި ގޮތުގައި، ނަތަންޔާހޫ ކުރިމަތިކުރާ މި ޝަރުތުތަކުގެ ސަބަބުން ބޯޑް އޮފް ޕީސްއަށާއި، ހަމާސްގެ ހަތިޔާރު ބެހެއްޓުމަށް މަސްތަކެއް ވަންދެން މަސައްކަތް ކުރަމުންދާ މެދުވެރިންނަށް ވަރަށް ބޮޑެތި ގޮންޖެހުންތަކެއް ކުރިމަތިވާނެ އެވެ.

މި ޕްލޭންގެ ދަށުން ނަތީޖާއެއްގެ ގޮތުން ޣައްޒާގެ އިދާރީ ކަންކަން ބަލަހައްޓާނީ ބޯޑް އޮފް ޕީސްގެ ބެލުމުގެ ދަށުން ހިންގާ ފަލަސްތީނުގެ ޓެކްނޮކްރެޓިކް ކޮމިޓީއަކުންނެވެ. ނަމަވެސް، ޓްރަމްޕް އުފެއްދެވި މި ބޯޑަށް އިޒްރޭލުގެ އެއްބާރުލުމާ ނުލައި ކުރިއަށް ދިއުމުގެ ބާރު ވަރަށް ކުޑަ ކަމަށް އޯޑޭ ބުންޏެވެ.

އޭނާ ސިފަކުރި ގޮތުގައި ނަތަންޔާހޫ މިވަނީ މުޅި މަރުހަލާ އަލުން ފަށަން ޖެހޭ ހިސާބަށް ގެންގޮސްފަ އެވެ.

ޣައްޒާގެ ސިއްހީ ވުޒާރާގެ ތަފާސްހިސާބުތަކަށް ބަލާއިރު، މިދިޔަ އަހަރުގެ އޮކްޓޯބަރު މަހުގެ މެދުތެރެއިން ފެށިގެން މިހާތަނަށް މަދުވެގެން 1,250 މީހުން މަރުވެ، 4,120 މީހުން ވަނީ ޒަހަމްވެފަ އެވެ.

އޮކްޓޯބަރު 2023 އިން ފެށިގެން އިޒްރޭލުން ދެމުންދާ ހަމަލާތަކުގައި ޣައްޒާއިން މަރުވި މީހުންގެ ޖުމްލަ އަދަދު މިހާރު ވަނީ މަދުވެގެން 73,300 އަށް އަރާފަ އެވެ. އަދި ޒަހަމްވި މީހުންގެ އަދަދު ވަނީ 174,000 އަށްވުރެ މައްޗަށް ގޮސްފަ އެވެ.