އެމެރިކާގެ އެކި ސަރަޙައްދުތަކުގައި 17 އަހަރުގެ މުއްދަތަކަށްފަހު ބިލިއަނުން ސިކާޑާ ނުކުތުމަށް ތައްޔާރުވަމުންދާ ކަމަށް ރިޕޯޓުތަކުން ދައްކަ އެވެ.

މިއީ މޭ މަހުގެ މެދުން ފެށިގެން ޖޫން މަހުގެ ނިޔަލަށް ހިނގާނެ ކަމަށް ލަފާކުރެވޭ ކަމެކެވެ.

މި ސިކާޑާތަކަކީ 17 އަހަރު ވަންދެން ބިމުގެ އަޑީގައި ހޭދަކުރުމަށްފަހު ނުކުންނަ ބާވަތެއްގެ ސޫފިތަކެކެވެ. މިފަދައިން ގިނަ އަދަދަކަށް ސިކާޑާ ނުކުތުމުން އެތަންތަނުގެ ވެށްޓަށް ބޮޑެތި ބަދަލުތަކެއް އަންނާނެ ކަމަށް ސައިންޓިސްޓުން ބުނެ އެވެ.

އެގޮތުން ޚާއްސަކޮށް އެ ސޮރުމެންގެ އަޑުއިވުމާއި، ގަސްގަހާގެއްސަށް ކުރާނެ އަސަރުތައް ސައިންސްވެރިން ފާހަގަކޮށްފައިވެ އެވެ.

މިއީ ގުދުރަތީ ވެށި ދިރާސާކުރާ ފަރާތްތަކަށް ވަރަށް މުހިންމު ދުވަސްވަރެކެވެ. އަދި މޫސުމަށް އަންނަ ބަދަލުތަކާ ގުޅިގެން މިފަދަ ހާދިސާތަކަށް އަންނާނެ ބަދަލުތައް ދެނެގަތުމަށް ވެސް މި ފުރުސަތު ބޭނުންކުރެވޭނެ ކަމަށް ލަފާކުރެވެ އެވެ.

މި ސިކާޑާތަކުގެ ލަޝްކަރުތައް ނުކުންނާނެ ކަމަށް ލަފާކުރެވެނީ ޖޯޖިއާ، ސައުތު ކެރޮލައިނާ، ޓެނެސީ، ކެންޓަކީ، އޮހާޔޯ، އިންޑިއާނާ، އިލިނޮއިސް، މިޒޫރީ އަދި ޕެންސިލްވޭނިއާ އިން ފެށިގެން ނިއު އިންގްލަންޑް އަށެވެ. މި ސިކާޑާތަކުގެ އަޑު 100 ޑެސިބަލްއަށްވުރެ މަތިވެދާނެ ކަމަށް ބެލެވެ އެވެ. މިއީ ޖެކްހެމަރެއްގެ އަޑާ އެއްވަރުގެ އަޑެކެވެ.

ސިކާޑާތަކުގެ މި ބާވަތް އަނެއްކާވެސް ނުކުންނާނީ 2041 ވަނަ އަހަރުގަ އެވެ.