ދުނިޔޭގެ ފުޓްބޯޅަ ދުނިޔޭގައި މިވަގުތު ހުރި އެންމެ ނުރައްކާތެރި އެއް ފޯވެޑް، އާރްލިންގް ހާލަންޑް އޭނާގެ ސިފައަށް ބޮޑު ބަދަލެއް ގެނެސްފި އެވެ.

އާންމުކޮށް ފުޓްބޯޅަ ދަނޑުމަތިން ދިގު އިސްތަށިގަނޑެއް އައްސައިގެން ފެންނަ ނޯވޭގެ މި ކުޅުންތެރިޔާ ވަނީ ކުއްލިއަކަށް އޭނާގެ މަޝްހޫރު ރަން ކުލައިގެ ދިގު އިސްތަށިގަނޑު ކޮށާލާފަ އެވެ. މި އާ ބަދަލާއެކު އޭނާ ފެންނަނީ މުޅިން ތަފާތު ސިފައެއްގައި ކަމަށްވު މުން، މިއީ ގިނަ ބަޔަކު ހައިރާން ކުރުވި ކަމެކެވެ.

ހާލަންޑްގެ މި އާ ސްޓައިލް ސޯޝަލް މީޑިއާގައި ފެނުމާއެކު، އިންޓަނެޓު ވަނީ ވަރަށް ބޮޑަށް ހޫނުވެފަ އެވެ. ހާއްސަކޮށް އެކްސް އާއި އިންސްޓަގްރާމްގައި ސަޕޯޓަރުންނާއި ފުޓްބޯޅަ އަށް ލޯބިކުރާ ފަރާތްތަކުން ދަނީ މިކަމާ ގުޅޭގޮތުން ތަފާތު ހިޔާލުތައް ފާޅުކުރަމުންނެވެ. ބައެއް މީހުން ބުނާގޮތުގައި މި އާ ލުކް އާއެކު އޭނާ މާ ބޮޑަށް ވެސް ޒުވާންވެފައި، ސިފަ ތަފާތެވެ.

މި ބަދަލާ ގުޅިގެން ސޯޝަލް މީޑިއާގައި ތަފާތު މީމްތަކާއި ޖޯކުތައް ވެސް ވަނީ އާންމުވާން ފަށާފަ އެވެ. ބައެއް ސަޕޯޓަރުން ވަނީ އޭނާގެ ކުރީގެ ދިގު އިސްތަށިގަނޑު މަތިން ހަނދާންވާނެ ކަމަށް ބުނެފަ އެވެ. ސަބަބަކީ ދަނޑުމަތީގައި އޭނާ ދުވާއިރު ދިގު އިސްތަށިގަނޑު ޕޮނީޓެއިލްއެއްގެ ގޮތަށް ލޮލަށް ފެންނަން ހުރުމަކީ އޭނާއަށް ހާއްސަ ތަފާތު ސިފައަކަށް ވެފައި އޮތުމެވެ.

ކުޅިވަރުގެ އިތުރުން ފެޝަނާއި ސްޓައިލްގެ ދާއިރާއަށް ވެސް އަބަދުވެސް ވަރަށް ބޮޑަށް ސަމާލުކަންދޭ ހާލަންޑް، މިފަދަ ބޮޑު ބަދަލެއް ގެނައީ ކީއްވެގެން ކަމެއް އަދި ހާމަކޮށްފައެއް ނުވެ އެވެ.

ބައެއް މީހުން ލަފާކުރާ ގޮތުގައި މިއީ އާ ސީޒަނަށް ނުކުތުމުގެ ކުރިން އޭނާގެ ލުކް އަށް ގެނައި އާ ބަދަލެކެވެ. އަދި އަނެއް ބަޔަކު ދެކޭގޮތުގައި މިއީ ހަމައެކަނި އަމިއްލަ ޝަޚުޞިއްޔަތަށް ގެނައި އާ ބަދަލެކެވެ.

ކޮންމެއަކަސް، ހާލަންޑް އިސްތަށިގަނޑު ކޮށާލުމުގެ ހަބަރާއެކު މިހާރު މުޅި އިންޓަނެޓުގައި އެންމެ ގަދައަށް ދެކެވެމުންދާ އެއް ވާހަކައަކީ އެއީ އެވެ.

ފުޓްބޯޅަ ދަނޑުތަކުގެ ބޭރުން ވެސް އަބަދުވެސް ސަމާލުކަން ހޯދާ މި ކުޅުންތެރިޔާގެ ކުރިއަށް ހުރި މެޗުތަކުން މި އާ އިސްތަށިގަނޑާ އެކު ފެނިގެން ދިއުމަށް ސަޕޯޓަރުން ދަނީ އިންތިޒާރު ކުރަމުންނެވެ.