މަޝްހޫރު ޑައިރެކްޓަރު ކަބީރު ހާންގެ އާ ފިލްމުގެ ޝޫޓިންގެ ތެރެއިން އެ ފިލްމުގެ އެއް ތަރި ކަމަށްވާ ކާތިކް އާރްޔާންގެ ކަކުލަށް ވަރަށް ބޮޑު އަނިޔާއެއް ލިބިއްޖެ އެވެ.

ބޮލީވުޑްގެ ހަބަރުތައް ބުނާ ގޮތުން، މި ހާދިސާ ހިނގާފައިވަނީ ވަރަށް ނުރައްކާތެރި އަދި ހައި-އޮކްޓޭން އެކްޝަން މަންޒަރެއް ޝޫޓް ކުރަމުން ދަނިކޮށެވެ.

ފިލްމުގެ ސެޓުގައި ހިނގި މި ހިތާމަވެރި ހާދިސާއާ ގުޅިގެން، ކާތިކް ވަގުތުން ޑޮކްޓަރަށް ދައްކާފައިވެ އެވެ. ޑޮކްޓަރުން ބެލިބެލުމުން ކަކުލަށް ލިބިފައިވާ އަނިޔާގެ ސީރިއަސްކަން ބޮޑުކަމަށް ފާހަގަ ކުރެވިފައިވާތީ، ވީ އެންމެ އަވަހަކަށް އޮޕަރޭޝަނެއް ކުރުމަށް ވަނީ ނިންމާފަ އެވެ.

މިފަދަ އަނިޔާތަކަކީ ކުޅަދާނަ އެކްޓަރުންގެ ކެރިއަރަށް ވެސް ނުރައްކާ ވެދާނެ ކަންކަމަށްވާތީ، ޑޮކްޓަރުންގެ ލަފަޔާ އެއްގޮތަށް ފަރުވާ ކުރިއަށް ގެންދިއުމަށް ވަނީ ތައްޔާރުވެފަ އެވެ.

މި އޮޕަރޭޝަނަށްފަހު ކާތިކް މަދު ދުވަސްކޮޅަކަށް ފުރިހަމަ އަރާމު ކުރުމަށް ޑޮކްޓަރުން ވަނީ ބާރުއަޅާފަ އެވެ. މި ސަބަބާހުރެ، މިހާރު ކުރިއަށްދާ ފިލްމުގެ ޝޫޓިންގެ މަސައްކަތްތައް ވަނީ ވަގުތީ ގޮތުން މުޅިން މަޑުޖައްސާލާފަ އެވެ. އޮޕަރޭޝަނަށްފަހު އޭނާ އަލުން މަސައްކަތަށް ނުކުންނާނެ ކަމަށް ލަފާކުރެވެ އެވެ.

ކާތިކްއަކީ އޭނާގެ ފިލްމުތަކުގައި އަމިއްލައަށް ގިނަ އެކްޝަން މަންޒަރުތައް ކުޅުމަށް މަޝްހޫރު ތަރި އެކެވެ. މީގެ ކުރިންވެސް ފިލްމުތަކުގެ ޝޫޓިންތަކުގައި އޭނާއަށް ކުދިކުދި އަނިޔާތައް ލިބިފައިވީ ނަމަވެސް، މިފަހަރު ލިބުނު އަނިޔާއަކީ އޮޕަރޭޝަނެއް ކުރަންޖެހޭ ފެންވަރުގެ ސީރިއަސް އަނިޔާއަކަށް ވުމުން ފިލްމުގެ ޓީމަށްވެސް ވަނީ ބޮޑު ގޮޮންޖެހުންތަކެއް ކުރިމަތިވެފަ އެވެ.

މި އަނިޔާގެ ސަބަބުން ކަބީރު ހާން ޑައިރެކްޓްކުރާ މި ފިލްމުގެ ޝޫޓިން ޝެޑިއުލަށް ވަރަށް ބޮޑެތި ބަދަލުތަކެއް އަންނާނެ ކަމަށް ބެލެވެ އެވެ. ފިލްމުގެ މަސައްކަތްތައް ލަސްވެގެންދިޔަ ނަމަވެސް، ޕްރޮޑަކުޝަން ޓީމުން އިސްކަން ދެމުންދަނީ ކާތިކްގެ ސިއްހީ ދުޅަހެޔޮކަމަށާއި އޭނާގެ ފަރުވާ އަށެވެ.

މި ހަބަރާއެކު ކާތިކްގެ ސަޕޯޓަރުން ދަނީ އޭނާއަށް އަވަސް ޝިފާއަކަށް އެދި ސޯޝަލް މީޑިއާގައި ޝުއޫރު ފާޅުކޮށް އޭނާއަށް ހިތްވަރުގެ ބަސްތައް ރައްދު ކުރަމުންނެވެ.