ހޮނިހިރު ދުވަހު ހަނގުރާމަ ފެށުނުއިރު އީރާނުން ފޮނުވަމުންދިޔަ މިސައިލްތަކުގެ އަދަދު މިހާރު ވަރަށް ބޮޑަށް މަދުވެފައިވާ ކަމަށް އެމެރިކާގެ އެންމެ އިސް ޖެނެރަލް ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކޭން ބުދަ ދުވަހު ވިދާޅުވެއްޖެ އެވެ.

އެމެރިކާގެ ހަމަލާތައް އީރާނުގެ އެތެރެއަށް ފުޅާކުރަމުންދާއިރު، އީރާނުގެ އަސްކަރީ ގާބިލުކަން ވަރަށް ބޮޑަށް ދަށްވެފައިވާ ކަމަށް އެމެރިކާއިން ވަނީ ބުނެފަ އެވެ.

ޕެންޓަގަންގައި ބޭއްވި ނޫސްވެރިންގެ ބައްދަލުވުމެއްގައި ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކޭން ވިދާޅުވީ، އެމެރިކާއިން މިހާރު އީރާނުގެ އެތެރެއަށް ހަމަލާތައް ފުޅާކުރަން ފަށާފައިވާ ކަމަށާއި އީރާނުގެ ސަރަހައްދުގެ އެންމެ ފުންމިނަށް ހަމަލާތައް ދީ، އެމެރިކާގެ ސިފައިންނަށް އިތުރު މިނިވަންކަމާއެކު ހަރަކާތްތެރިވެވޭނެ މަގު ފަހިކުރާނެ ކަމަށް އޭނާ ވިދާޅުވި އެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވީ އީރާނާ ދެކޮޅަށް ކުރާ ހަނގުރާމައިގައި އެމެރިކާ ކުރިހޯދަމުން ދާ ކަމަށެވެ. ނަމަވެސް މި ހަނގުރާމައިގައި މިހާތަނަށް އެމެރިކާގެ ހަ ސިފައިން މަރުވެފައިވާތީ އެކަމާ ހިތާމަކުރައްވާ ކަމަށް އޭނާ ވިދާޅުވި އެވެ. އަދި އީރާނަށްވުރެ ގިނަ ދުވަހު ހަނގުރާމައިގައި ދެމިއޮތުމުގެ ގާބިލުކަން އެމެރިކާއަށް ލިބިގެންވާ ކަމަށްވެސް އޭނާ ވިދާޅުވި އެވެ.

މީގެ އިތުރުން، ސްރީލަންކާގެ އައްސޭރިފަށުން އީރާނުގެ ހަނގުރާމަމަތީ މަނަވަރެއް އެމެރިކާގެ އަސްކަރިއްޔާއިން ފައްތާލާފައިވާކަން ހެގްސެތު ވަނީ ކަށަވަރުކޮށްދެއްވާފަ އެވެ. މިއީ ދެވަނަ ބޮޑު ހަނގުރާމައަށްފަހު ޓޯޕިޑޯ ބޭނުންކޮށްގެން އުޅަނދެއް ފައްތާލި ފުރަތަމަ ފަހަރު ކަމަށް އޭނާ ވިދާޅުވި އެވެ.

ރޮއިޓާސްއިން އެންމެ ފުރަތަމަ ރިޕޯޓްކުރި މި ހާދިސާއާ ގުޅޭގޮތުން ހެގްސެތު ވިދާޅުވީ، އެމެރިކާގެ ސަބްމެރިންއަކުން އީރާނުގެ ހަނގުރާމަމަތީ މަނަވަރެއް ފައްތާލީ އެއީ ބައިނަލްއަގުވާމީ ކަނޑުގެ ސަރަހައްދުގައި ރައްކާތެރިކަމާއެކު އޮތް އުޅަނދެއް ކަމަށް ހީކޮށްފައި އޮއްވާ ކަމަށެވެ. އެކަމަކު އެ އުޅަނދު ފައްތާލީ ޓޯޕިޑޯއަކުން ކަމަށް ވިދާޅުވި އެވެ.