ދައުލަތުގެ ބަޖެޓުން އެކަނިވެރި މައިންނާއި ބަފައިންނަށް ދޭ އެލަވަންސް ދޭ އުސޫލަށް ބަދަލު ގެނެސް 15،000ރ. އާއި ހަމައަށް އެ އިނާޔަތް ދެވޭނެހެން ގަވާއިދަށް އިއްޔެ އިސްލާހު ގެނައުމަށްފަހު އެ އިނާޔަތް ދެވޭ އަދަދު 12،000ރ. އަށް ކުޑަކޮށްފި އެވެ.

އެންސްޕާ އިން މިއަދު އެ ގަވާއިދަށް ގެނައި ދެވަނަ އިސްލާހު ގެޒެޓުކޮށްފަ އެވެ.

އެކަނިވެރި މައިންނާއި ބަފައިންނަށް މިހާތަނަށް އިނާޔަތުގެ ގޮތުގައި ދެމުން އައީ މަހެއް މައްްޗަށް ކޮންމެ ކުއްޖަކަށް 1،000ރ. އެވެ. އަދި އެންމެ ގިނަވެގެން ދެމުން އައީ މަހެއްގެ މައްޗަށް 10،000ރ. އެވެ.

ކުރިން މަހެއްގެ މައްޗަށް ހަތަރު ކުދިންނާއި ހަމައަށް ކޮންމެ ކުއްޖަކަށް ދެމުން އައި އިނާޔަތް އިއްޔެ ވަނީ 3،000ރ. އަށް ބޮޑުކޮށްފަ އެވެ. ހަތަރަކަށްވުރެ ގިނަ ކުދިން ތިބި ބެލެނިވެރިއެއްނަމަ އިތުރުވާ ކޮންމެ ކުއްޖަކަށް ދޭނީ 1،000ރ. އެވެ.

ނަމަވެސް ހަތަރު ކުދިންނަށްވުރެ ގިނަ ކުދިން ތިބި ނަމަވެސް އިތުރު ފައިސާއެއް ނުލިބޭނެ ގޮތަށް މިއަދު ވަނީ ހަމަޖައްސާފަ އެވެ. އިނާޔަތުގެ ގޮތުގައި ލިބޭނީ ހަތަރު ކުދިންނަށް، ކޮންމެ ކުއްޖަކަށް ދޭ 3،000ރ. އެކަންޏެވެ.

މަހެއްގެ މައްޗަށް ދެވޭ އެންމެ ބޮޑު އަދަދު އިއްޔެ 15،000ރ. އަށް ބޮޑުކުރިޔަސް ދެން އެވަރެއް ނުލިބޭނެއެވެ. ދެން ލިބޭނީ ގިނަވެގެން 12000ރ. އެވެ.

މި ބަދަލު ގެނައި ސަބަބެއް ސަރުކާރުން އަދި ހާމައެއް ނުކުރެ އެވެ.

އެކަނިވެރި މައިންނާއި ބަފައިންގެ އެލަވަންސް ލިބޭ 5000 އަށްވުރެ ގިނަ މީހުން އެބަތިއްބެވެ.