ފިނިފެން މަލަކީ ދުނިޔޭގެ ގިނަ ބަޔަކަށް އެންމެ ކަމުދާ މަލުގެ ގޮތުގައި ބެލެވިފައިވާ މަލަށް ވާއިރު އެއީ އާއްމު ދިރިއުޅުމުގައި ވެސް ވަރަށް ގިނައިން ބޭނުން ކުރެވޭ މަލެކެވެ.
ގުދުރަތީ ގޮތުން ފިނިފެން މަލުގެ ތަފާތު ކުލަތައް ހެދޭއިރު އަހަރުމެން އެ ކުލަތައް ބޭނުން ކުރަނީ އަނެކާއަށް ތަފާތު އެކި މެސެޖުތައް ފޮނުވުމަށެވެ. އެގޮތުން ބޭނުންކުރެވޭ ބައެއް ކުލަތަކަށް ބަލާލާނަމެވެ.
ރަތް ކުލަ
ޝައްކެއް ވެސް ނެތް ގޮތުގައި ރަތް ކުލަ ރަމްޒުކޮށްދެނީ ލޯތްބެވެ. އެއީ ލޯބިވެރިންގެ ދުވަހުގެ އެންމެ މަޝްހޫރު މާ ވެސް މެ އެވެ. މީހަކަށް ރަތް ފިނިފެންމަލެއް ދޭ ނަމަ އޭގެ މާނައަކީ އޭނާ ދެކެ ވަރަށް ލޯބިވާ ކަމަށެވެ. އަދި އެކުގައި ދިރިއުޅެން ބޭނުންވާ ކަމެވެ.
ފިޔާތޮށި ކުލަ
އާންމުކޮށް ހުރިހާ ފިޔާތޮށި މަލުންވެސް ދައްކުވައިދެނީ ޝުކުރުވެރިކަމާއި އުފާވެރިކަމެވެ. އެހެންކަމުން މީހަކަށް ޝުކުރު އަދާކޮށް، އަގުވަޒަން ކުރުމުގެ ގޮތުން ފިޔާތޮށި ކުލައިގެ މާ ދީ އުޅެ އެވެ.
ދަނބު ކުލަ
މަޑު ދަނބު ކުލައިގެ ފިނިފެންމަލަކީ ފިޔާތޮއްޓާއި ރަތް މަލާ ހިލާފަށް ވަރަށް މަދުން ހުންނަ އެއްޗެކެވެ. އެހެން ކަމުން ތިބާގެ ހަޔާތުގައި ހުރި އެންމެ މުހިއްމު ކުއްޖާއަށް މި ކުލައިގެ ފިނިފެންމަލެއް ދޭން ރަނގަޅުވާނެ އެވެ. މީގެ އިތުރުން ދަނބު ފިނިފެންމަލަކީ ވަރަށް ޝާހީ ގޮތެއް ވެސް ހުންނަ މަލެކެވެ.
ރީނދޫ ކުލަ
ރީނދޫ ކުލައަކީ އާންމުކޮށް އުފާވެރިކަން ދައްކުވައިދޭ ކުލައެކެވެ. މިކުލައިގެ ފިނިފެންމަލުން އެކުވެރިކަމާއި ރަހުމަތްތެރިކަން ރަމްޒުކޮށްދޭއިރު ފްރެންޑްޝިޕް ޑޭގައި އެންމެ މަގުބޫލު ކުލައަކީ މިއީ އެވެ.
އޮރެންޖް ކުލަ
ރީނދޫ ކުލަ ފަދައިން އޮރެންޖް ކުލައަކީ ވެސް ރަހުމަތްތެރިކަމުގެ ގުޅުން ރަމްޒުކޮށްދޭ ކުލަ އެކެވެ. ތިބާ ލޯބިވާ މީހަކްދެކެ ފަހުރުވެރިވާކަން ހާމަކޮށްދޭން މި ކުލައިގެ ފިނިފެންމާ ބޭނުންކުރެވެ އެވެ.
ހުދު ކުލަ
ހުދު ފިނިފެންމާ އާންމުކޮށް ދައްކުވައިދެނީ އަމާން ކަމާއި ސުލްހަވެރިކަމާއި މައުސޫމްކަމެވެ. މިއީ ކައިވެނީގެ ހަފްލާތަކަށް ވެސް ހާއްސަ މަލެކެވެ. ސަބަބަކީ ކައިވެނި ހަފްލާ އަކީ މުޅިން އާ ފެށުމަކަށް ކަމަށް ވާތީ އެވެ. މީގެ އިތުރުން އަލަށް ގުޅުމެއް އުފެދިގެން އަންނަ އިރު ލޯބިވެރިޔާއަށް ހަދިޔާ ކުރުމަށް ހުދު ފިނިފެންމާ އިހުތިޔާރުކުރެވިދާނެ އެވެ.
ކަޅު ކުލަ
ކަޅު ކުލައިން ދޭހަކޮށްދެނީ ހިތްވަރާއި ފަންވަރާއި އަޒުމެވެ. ދިރިއުޅުމުގައި ބޮޑު ކަމަކަށް ކުރިމަތިލާން އުޅޭ މީހަކަށް ކަޅު ފިނފެން މަލެއް ދިނުން ރަނގަޅުވާނެ އެވެ. އެހެން ނަމަވެސް ކަޅު ފިނިފެން މަލަކީ ވަރަށް މަދުން ނޫނީ ނުފެންނަ މަލެކެވެ.
