މަޝްހޫރު ލަވަކިޔުންތެރިޔާ ޓޭލާ ސްވިފްޓް އެންގޭޖްވި ނަމަވެސް އޭނާއަށް މަރުހަބާ ކިޔަން ކުރީގެ އެންމެ ގާތް އެކުވެރިޔާ ބްލޭކް ލައިވްލީ ބޭނުންނުވާ ކަމަށް ރިޕޯޓުތައް ބުނެފި އެވެ.

ޓޭލާގެ އެންގޭޖްމަންޓާއެކު އާއްމުންގެ އިތުރުން ހޮލީވުޑްއާއި އެމެރިކާގެ ސިޔާސީ ވެރިން ވެސް އޭނާއަށް މަރުހަބާ ކީއިރު ބްލޭކްގެ ބަހެއް ލިބިފައެއް ނުވެ އެވެ.

އެކަމާ ބެހޭގޮތުން މީޑިއާއަށް މައުލޫމާތު ދިން މަސްދަރަކުން ހާމަކުރި ގޮތުގައި ބްލޭކް ޓޭލާއަށް މަރުހަބާ ކިޔާފައިނުވާއިރު އެކަން ކުރަން އޭނާ ގަސްދެއް ވެސް ނުކުރެ އެވެ.

އެގޮތުން ޓޭލާއަށް މަރުހަބާ ކިޔުމަށްވުރެ ބޮޑެތި ކަންކަން ކުރަން ބްލޭކްއަށް ޖެހިފައިވާ ކަމަށް ވެސް އެ ފަރާތުން ހާމަކުރި އެވެ. އެ އިޝާރާތް ކޮށްފައިވަނީ ކޯޓުގައި މިހާރު ހިނގަމުންދާ މައްސަލަ އަށެވެ.

ބްލޭކްއާއި ޓޭލާއަކީ އެއް އިރެއްގައި ވަރަށް ގާތް ދެ ރަހުމަތްތެރިންނަށްވާއިރު އެ އެކުވެރިކަމުގައި އެންމެ ފުރަތަމަ މައްސަލަ ޖެހުނީ ބްލޭކްއާއި ޖަސްޓިން ބެލްޑޯނީގެ ގާނޫނީ ކޯޅުމުގެ ތެރެއަށް ޓޭލާގެ ނަން ވެއްދުމުންނެވެ.

އެގޮތުން ބްލޭކް ޖަސްޓިންއަށް ކުރި ޖިންސީ ފުރައްސާރައިގެ ދައުވާގައި ޓޭލާއަކީ އޭނާގެ ހަތިޔާރެއްގެ ގޮތުގައި ސިފަކޮށްފައިވާ ކަމަށް ހަބަރުތައް ބުނެ އެވެ.

އޭގެ ފަހުން އެ ދެމީހުންގެ ގުޅުން ހީނަރުވެ ބައްދަލުވެ އުޅުމާއި ވާހަކަ ދެއްކުން ވެސް ވަނީ ހުއްޓާލާފަ އެވެ.