ޗައިނާ ސަރުކާރުން ދިވެހިރާއްޖެއަށް އަލަށް ކަނޑައަޅުއްވާފައިވާ ސަފީރު ކޮންގް ޝިއަންހުއާ، މިއަދު ރައީސް މުހައްމަދު މުއިއްޒަށް ސަފީރުކަމުގެ ފަތްކޮޅު އަރުވައިފި އެވެ.

ރައީސް އޮފީހުގައި މިއަދު ހެނދުނު ބޭއްވުނު ހާއްސަ ރަސްމިއްޔާތެއްގައި ސަފީރު ކޮންގް ފަތްކޮޅު އެރުވި އެވެ. މި ރަސްމިއްޔާތުގައި ހާރިޖީ ވަޒީރު ޑރ. ޢަބްދުﷲ ހަލީލާއި، ސަރުކާރުގެ އެހެނިހެން އިސް ބޭފުޅުންނާއި، ޗައިނާ އެމްބަސީގެ އޮފިޝަލުން ބައިވެރިވެ ވަޑައިގެންނެވި އެވެ.

ފަތްކޮޅު އެރުވުމަށްފަހު، ރައީސް މުއިއްޒާއި ސަފީރު ކޮންގް ބައްދަލުކުރައްވައި މަޝްވަރާތަކެއް ކުރިއަށް ގެންދެވިކަމަށް ރައީސް އޮފީހުން މައުލޫމާތުދިނެވެ. މި ބައްދަލުވުމުގައި ދެ ގައުމުގެ ގުޅުން އިތުރަށް ހަރުދަނާކުރުމާއި، ދިވެހިރާއްޖޭގެ ތަރައްގީއަށް ޗައިނާއިން އެހީތެރިކަން ފޯރުކޮށްދިނުމާ ގުޅޭ މަޝްވަރާތައް ކުރެވުނު ކަމަށް ރައީސް އޮފީހުން ބުނެ އެވެ.

ސަފީރު ކޮންގް ވަނީ ހާރިޖީ ވަޒީރު ޑރ. ހަލީލާވެސް ވަކިން ބައްދަލުކުރައްވާފަ އެވެ. މި ބައްދަލުވުމުގައިވެސް ދެ ގައުމުގެ ދެމެދުގައިވާ ގުޅުންތައް އިތުރަށް ވަރުގަދަކުރުމާ ގުޅޭގޮތުން މަޝްވަރާކުރެވުނު ކަމަށް ހާރިޖީ ވުޒާރާއިން ހާމަކޮށްފައިވެ އެވެ.

ޗައިނާއިން ރާއްޖެއަށް ކަނޑައަޅާ ސަފީރުންގެ މުއްދަތަކީ ތިން އަހަރު ދުވަހެވެ. މީގެ ކުރިން ރާއްޖޭގައި ހުންނެވި ޗައިނާގެ ސަފީރު ވާންގް ލީޖިން އެނބުރި ވަޑައިގެންނެވީ މިދިޔަ އަހަރުގެ ޑިސެންބަރު މަހު އެވެ.

އައު ސަފީރު ކޮންގް ޝިއަންހުއާ މީގެ ކުރިން މަސައްކަތް ކުރައްވާފައިވަނީ އިންޑިއާގެ މުންބާއީގައި ހުންނަ ޗައިނާގެ ކޮންސިއުލޭޓް ޖެނެރަލްގެ މަގާމުގަ އެވެ. އެ މަގާމުގައި އޭނާ ތިން އަހަރު ދުވަހު ހިދުމަތް ކުރެއްވި އެވެ.