މަސްތުވާތަކެއްޗާއެކު އަތުލައިގަތް އިސްމާއިލް އިފްހާމް މުހައްމަދު (ޕެސްޓް)، 15 ދުވަހު ބަނދުގައި ބަހައްޓައިގެން މައްސަލަ ތަހުގީގުކުރަން ކްރިމިނަލް ކޯޓުން އަންގައިފި އެވެ.

ފުލުނުންނަށް ލިބުނު އިންޓެލިޖެންސް ރިޕޯޓަކާ ގުޅިގެން ޑްރަގް އެންފޯސްމެންޓް ޑިޕާޓްމެންޓް (ޑީއީޑީ) އިން ރޭ ހިންގި އޮޕަރޭޝަނެއްގައި ޕެސްޓްއާއިއެކު އަދި އިތުރު ހަތަރު މީހުންވަނީ ހައްޔަރުކޮށްފަ އެވެ. އޭނާ ހައްޔަރުކުރިއިރު 2.5 ކިލޯގެ ޑްރަގް އަތުލައިގަތް ކަމަށްވެ އެވެ.

މިމައްސަލައާ ގުޅޭ އިތުރު ތަފްސީލު ފުލުހުން އަދި ހާމަކޮށްފައެއް ނުވެ އެވެ.

ސިމްބޮލިކް ރެކޯޑްސްގެ ކޯ ފައުންޑަރު، އަދި އާޓިސްޓެއްކަމަށްވާ ޕެސްޓަކީ ރާއްޖޭގެ "ކިންގް އޮފް ރެޕް"ގެ ގޮތުގައި މަޝްހޫރުވެފައިވާ ފަންނާނެކެވެ.

ޅަ އުމުރުގައި ރެޕްގެ ދުނިޔެއަށް ނަން ވިދާލި ޕެސްޓްގެ ގިނަ ލަވަތަކެއް އެންމެ ފަހުން ސިމްބޯލިކް ރެކޯޑްއިން ނެރުނު "ކޯވަރެއް" އަލްބަމްގައި ހިމެނެ އެވެ.