ގިނަ ބައެއްގެ ލޯބި ހޯދާފައިވާ މަޝްހޫރު ފިލްމު ސިލްސިލާ "ދަ ޕްރިންސަސް ޑައިރީސް"ގެ ތިންވަނަ ބައާ ގުޅޭގޮތުން ބަތަލާ އޭން ހެތަވޭ އާ ވާހަކަތަކެއް ހާމަކޮށްފި އެވެ.

މި ފިލްމުގެ ސަޕޯޓަރުން ގިނަ ދުވަސްތަކެއް ވަންދެން އިންތޒާރު ކުރަމުން އަންނަ މި ފިލްމުގެ މަސައްކަތް މިހާރު ވެސް ކުރިއަށްދާ ކަމަށް އޭނާ ވަނީ ކަށަވަރު ކޮށްދީފަ އެވެ.

އޭން ހެތަވޭ ބުނެފައިވަނީ މި ފިލްމުގެ މަސައްކަތް ކުރިއަށްދަނީ ވަރަށް ފަރުވާތެރިކަމާއެކު ކަމަށާއި، ސަޕޯޓަރުން އުއްމީދުކުރާ ފަދަ ފުރިހަމަ އުފެއްދުމަކަށް މި ފިލްމު ހެދުމަށްޓަކައި ވަގުތު ނަގާ ކަމަށެވެ. އެއާއެކު މި ފިލްމާ މެދު އޭނާ ހުރީ ވަރަށް ބޮޑަށް ހިތްހަމަޖެހިފައި ކަމަށް ވެސް އޭނާ ފާހަގަކުރި އެވެ.

ފުރަތަމަ ދެ ފިލްމަށް ލިބުނު ބޮޑު ކާމިޔާބީއަށްފަހު، ތިންވަނަ ބަޔަކަށް ސަޕޯޓަރުން ތިބީ ކެތްމަދުވެފަ އެވެ. އޭން ހެތަވޭ އަލުން "މިއާ ތާމޮޕޮލިސް"ގެ ރޯލުން ފެނިގެންދާނެ މި ފިލްމަކީ ކުރީގެ ފިލްމުތަކާ ގުޅުވައިގެން، އެހެން ނަމަވެސް މިއަދުގެ ޒަމާނީ ވައްޓަފާޅިއަށް ފެތޭ ގޮތަށް ތައްޔާރުކުރާ ފިލްމެކެވެ.

ފިލްމުގައި އޭން ފެނުނު ނަމަވެސް ކުރީގެ ދެ ފިލްމުގައި މުހިއްމު ރޯލަކުން ފެނިގެންދިޔަ މިހާރު އުމުރުން 70 އަހަރު ވެފައިވާ ޖޫލީ އެންޑްރޫސް ތިންވަނަ ބައިގައި ފެންނާނެ ކަމަކަށް ނުބެލެވެ އެވެ.

އެޑޭލް ލިމް މި ފިލްމުގެ ޑައިރެކްޝަންއާ ހަވާލުވެގެން ހުރިއިރު ޑިޒްނީ ޕިކްޗާސްއިން އަންނަނީ މި ފިލްމުގެ މަސައްކަތް ބާރު ސްޕީޑެއްގައި ކުރަމުންނެވެ.

މި ފިލްމު ރިލީޒް ކުރާނެ ތާރީޚެއް ރަސްމީކޮށް އަދި އިއުލާން ކޮށްފައި ނުވި ނަމަވެސް އޭން ހެތަވޭގެ މި އާ ވާހަކަތަކާއެކު ސަޕޯޓަރުންގެ އުއްމީދުތައް ވަނީ އިތުރަށް އާވެފަ އެވެ.