އިންޑިއާގެ މަޝްހޫރު ފިލްމީ ތަރި ގޯވިންދާ އާއި އޭނާގެ އަންހެނުން ސުނީތާ އަހޫޖާގެ ދެމެދުގައި އުފެދިފައިވާ ދެބަސްވުންތައް އިތުރަށް ގޯސްވެ، އެކަމާ ގުޅިގެން ގޯވިންދާ އޭނާގެ އަނބިމީހާއަށް ވަރަށް ބޮޑަށް ފާޑުކިޔައިފި އެވެ.

މި މައްސަލަ ހޫނުވީ ގޯވިންދާ އާއި އެކްޓްރެސް ކޮމަލް ރާނީ ސުވަންކަރް އެކުގައި ފެނިގެންދިޔުމުން ސުނީތާ އެކަމާ މެދު ނުރުހުން ފާޅުކޮށް، ގޯވިންދާއާ މެދު ހުތުރު ބަހުން ވާހަކަ ދެއްކުމާ ގުޅިގެންނެވެ.

ސުނީތާ ވަނީ ގޯވިންދާ އޭނާގެ ދަރިފުޅާ އެއް އުމުރުގެ ކުއްޖަކާއެކު އުޅޭ ކަމަށް ބުނެ، އޭނާއަށް "ޝުގާ ޑޭޑީ" ގެ ނަމުން މުހާތަބުކޮށް ފާޑުކިޔާފަ އެވެ.

މިކަމާ ގުޅިގެން ގޯވިންދާ ވަނީ ވީޑިއޯއެއް މެދުވެރިކޮށް އޭނާގެ އަނބިމީހާގެ މި އަމަލުތަކަށް ވަރަށް ބޮޑަށް ފާޑުކިޔާފަ އެވެ. ގޯވިންދާ ބުނީ، ސުނީތާ ފަހަކަށް އައިސް ވަރަށް ހުތުރު ބަހުން ވާހަކަ ދައްކަމުންދާ ކަމަށާއި، އެފަދަ ހުތުރު ބަސްތައް ބޭނުން ކުރުމަކީ މައިންނާއި އުހުތުންގެ ނަން ކިލަނބުވާނެ ކަމެއް ކަމަށެވެ.

އެއާއެކު އޭނާގެ އަނބިމީހާގެ މިފަދަ ހުތުރު އަމަލުތަކުގެ ސަބަބުން ޒުވާނުންނަށް ނުރަނގަޅު ނަމޫނާއެއް ދެއްކޭ ކަމަށް ވެސް ގޯވިންދާ ފާހަގަކުރި އެވެ.

މީގެ އިތުރުން، ގޯވިންދާ ވަނީ އޭނާގެ ކުރިއަށް ހުރި ފިލްމީ މަސައްކަތްތަކަށް ސުނީތާ ހުރަސްއަޅައި، އޭނާގެ އަގު ވައްޓާލަން މަސައްކަތް ކުރަމުންދާ ކަމުގެ ތުހުމަތު ވެސް ކޮށްފަ އެވެ.

މީގެ އިތުރުން ޒުވާން އެކްޓަރުންނާއެކު ފިލްމުތަކުގައި މަސައްކަތް ކުރުމަކީ އޭނާގެ ފަންނީ ހަޔާތުގެ ބައެއް ކަމަށާއި، އެކަމަށް ސުނީތާ ފާޑުކިޔުމަކީ ބަލައިގަނެވޭނެ ކަމެއް ނޫން ކަމަށް ވެސް އޭނާ ބުންޏެވެ.

މި ދެމަފިރިންގެ ދެމެދުގައި މި އުފެދުނު ހިޔާލު ތަފާތުވުންތަކާއި މި ފާޑުކިޔުންތަކަކީ މިހާރު ބޮލީވުޑްގެ މީޑިއާތަކުގައި އެންމެ ބޮޑަށް ދެކެވެމުންދާ އެއް ވާހަކަ އެވެ.