އިމްރާން ހާޝްމީގެ ކެރިއަރުގެ އެންމެ މަގުބޫލު އެއް ފިލްމު ކަމަށްވާ "އަވާރަޕަން"ގެ ދެވަނަ ބައި، "އަވާރަޕަން 2" ސިނަމާތަކަށް އައުމުގެ ކުރިންވެސް ބޮކްސް އޮފީހުގައި އާ ރެކޯޑެއް ހަދައިފި އެވެ.

2007 ވަނަ އަހަރު ނެރުނު ފުރަތަމަ ފިލްމަކީ ރިލީޒްކުރި ދުވަސްވަރު ބޮކްސް އޮފީހުގައި މާބޮޑު ކާމިޔާބީއެއް ނުހޯދުނު ފިލްމެއް ނަމަވެސް، ފަހުން އެ ފިލްމު ވަނީ އާންމުންގެ މެދުގައި ވަރަށް ބޮޑު މަގުބޫލު ކަމެއް (ކަލްޓް ކްލެސިކްއެއްގެ ދަރަޖަ) ހޯދާފަ އެވެ.

އިއްޔެ ރިލީޒްކުރި މި ފިލްމުގެ ލީޑު ރޯލުތަކުން ފެނިގެންދަނީ އިމްރާން ހާޝްމީ، ދިޝާ ޕަޓާނީ، އަދި ޝަބާނާ އާޒްމީ އެވެ. ނިތިން ކައްކަރް ޑައިރެކްޓް ކޮށްފައިވާ މި ފިލްމުގެ އެޑްވާންސް ބުކިންގްސްއަށް ލިބެމުންދާ ތަރުހީބަށް ބަލާއިރު، މިއީ އިމްރާންގެ ކެރިއަރުގައިވެސް އެންމެ ބޮޑު އޯޕަނިންގް ހޯދާނެ ފިލްމަށް ވާނެކަމަށް ވަނީ ބެލެވިފަ އެވެ.

ނޫސްތަކުން ރިޕޯޓު ކޮށްފައިވާ ގޮތުގައި، ފިލްމު ރިލީޒް ކުރުމުގެ އެންމެ 48 ގަޑިއިރު ކުރިން އެޑްވާންސް ބުކިންގްސް ހުޅުވާލިއިރު، ބުދަ ދުވަހު އެކަނިވެސް ވަރަށް ބޮޑު ތަރުހީބެއް ވަނީ ލިބިފަ އެވެ.

ފުރަތަމަ 18 ގަޑިއިރުގެ ތެރޭގައި ފިލްމު ބަލަން 1.3 ލައްކައަށްވުރެ ގިނަ ޓިކެޓް ވަނީ ވިކިފަ އެވެ. ސެކްނިލްކްއިން ހާމަ ކޮށްފައިވާ ގޮތުގައި، ފުރަތަމަ ދުވަހުގެ ޝޯތަކަށް އެކަނިވެސް 4 ކްރޯޑު ރުޕީސްގެ ޓިކެޓް ވަނީ ވިކިފަ އެވެ.

އެއާއެކު މުޅި ހަފްތާ ބަންދަށް ބަލާއިރު އެޑްވާންސް ބުކިންގްސްއިން ލިބުނު ފައިސާގެ އަދަދު ވަނީ 7-8 ކްރޯޑު ރުޕީސްއަށް އަރާފަ އެވެ. މިއީ 2007 ވަނަ އަހަރު ނެރުނު އަވާރަޕަން ފިލްމަށް ލިބުނު ޖުމްލަ އާމްދަނީ ކަމަށްވާ 7.7 ކްރޯޑު ރުޕީސްއަށް ވުރެ ބޮޑު އަދަދެކެވެ.

އެހެން ކަމުން ސްކްރީންތަކަށް އައުމުގެ ކުރިންވެސް "އަވާރަޕަން 2" ވަނީ ފުރަތަމަ ފިލްމުގެ ރެކޯޑު މުގުރާލާފަ އެވެ. ޓްރޭޑް އެނަލިސްޓުން ލަފާކުރާ ގޮތުގައި މި ފިލްމަށް ފުރަތަމަ ދުވަހު ގާތްގަނޑަކަށް 15 އާއި 20 ކްރޯޑު ރުޕީސްއާ ދެމެދުގެ އާމްދަނީއެއް ލިބޭނެ އެވެ.

އެއާއެކު ފުރަތަމަ ހަފްތާ ބަންދު ނިމޭއިރު، ދުނިޔޭގެ އެކި ކަންކޮޅުތަކުން 100 ކްރޯޑު ރުޕީސްގެ އާމްދަނީއެއް ހޯދާނެ ކަމަށް ލަފާ ކުރެވެ އެވެ. މިއީ ފުރަތަމަ ފިލްމަށް ލިބުނު ޖުމްލަ އާމްދަނީއަށްވުރެ ގާތްގަނޑަކަށް 8 ގުނަ ބޮޑު އަދަދެކެވެ.

އަވާރަޕަން 2 އާ އެއްދުވަހެއްގައި، ރާޖްކުމާރު ސަންތޯޝީ ޑައިރެކްޓްކޮށް ސަނީ ޑިއޯލް ލީޑު ރޯލު ކުޅެފައިވާ ފިލްމު "ބަޓްވާރާ 1947" ވެސް ސިނަމާތަކަށް އަންނާނެ އެވެ. ނަމަވެސް އެޑްވާންސް ބުކިންގްސްގެ ރޭހުގައި "ބަޓްވާރާ" އަށް ވުރެ 4 ގުނަ ކުރީގައި އުޅެނީ "އަވާރަޕަން 2" އެވެ.

ސަނީ ޑިއޯލްގެ ފިލްމަށް ފުރަތަމަ ދުވަހު ލިބޭނެ ކަމަށް އަންދާޒާކު ރެވެނީ 8-10 ކްރޯޑު ރުޕީސް އެވެ. އެހެންކަމުން ބޮކްސް އޮފީހުގެ މި ކުރިމަތިލުމުން ފަސޭހަ ކަމާއެކު ކާމިޔާބު ހޯދާނީ އިމްރާންގެ "އަވާރަޕަން 2" ކަން މިވަނީ ގާތްގަނޑަކަށް ޔަގީންވެފަ އެވެ.