ބެލުންތެރިންގެ ބޮޑު މަގުބޫލުކަމެއް ހޯދާފައިވާ އެމެރިކާގެ ލަވަކިޔުންތެރިޔާ ޓޭލާ ސުވިފްޓްގެ މާލީ ކާމިޔާބީތައް އާ އުސްމިނަކަށް ގޮސް އޭނާގެ މިލްކިއްޔާތުގެ އަގު ދެ ބިލިއަން އެމެރިކާ ޑޮލަރަށްވުރެ މައްޗަށް އަރައިފި އެވެ.

ފޯބްސް މެގަޒިންގެ ރިޕޯޓަކުން ހާމަ ކޮށްފައިވާ މި އާ ހިސާބުތަކާ އެކު ޓޭލާ ސުވިފްޓް މިވަނީ މިއުޒިކްގެ ތާރީހުގައި ވެސް އެންމެ މުއްސަނދި އަންހެން ފަންނާނުގެ ޝަރަފު ހޯދާފަ އެވެ.

ފޯބްސްއިން ނެރުނު "އައިކޮނޮކްލާސްޓް 50" ލިސްޓުގައިވާ ގޮތުން 2024 ވަނަ އަހަރު ޓޭލާ ބިލިއަނަރަކަށް ވީއިރު އޭނާގެ މިލްކިއްޔާތުގައި ހުރީ 1.1 ބިލިއަން ޑޮލަރެވެ.

ނަމަވެސް، ވޭތުވެދިޔަ ދެ އަހަރެއްހާ ދުވަހުގެ ތެރޭގައި އޭނާގެ މުއްސަނދިކަން މިވަނީ ދެގުނައަށް އިތުރުވެފަ އެވެ. މިއީ ފެޝަން ބްރޭންޑުތަކެއް ނުވަތަ ވިޔަފާރި ކުންފުނިތަކެއްގެ އެހީއާ ނުލައި ހަމައެކަނި މިއުޒިކާއި ކޮންސެޓްތަކުން މިވަރުގެ ބޮޑު މުއްސަނދިކަމެއް ހޯދި ފުރަތަމަ ފަންނާނެވެ.

މިލްކިއްޔާތު އިތުރުވާން މެދުވެރިވި މައިގަނޑު ސަބަބުތައް

  • އިރާސް ޓުއާ: ޓޭލާގެ މާލީ ކުރިއެރުމުގެ އެންމެ ބޮޑު ބާރަކީ އޭނާ ބޭއްވި ތާރީޚީ "އިރާސް ޓުއާ" އެވެ. މިއީ ދުނިޔޭގެ ތާރީހުގައި ވެސް އެންމެ ބޮޑު އާމްދަނީއެއް ހޯދި ކޮންސެޓް ޓުއާ އެވެ. މި ޓުއާއިން އެކަނިވެސް 2.2 ބިލިއަން ޑޮލަރުގެ އާމްދަނީއެއް ލިބިފައިވެ އެވެ.
  • ލަވަތައް އަލުން ރެކޯޑު ކުރުން: އޭނާގެ ކުރީގެ އަލްބަމްތަކުގެ މިލްކިއްޔާތާ މެދު އުފެދުނު މައްސަލަތަކާ ގުޅިގެން، 2020 އިން ފެށިގެން އޭނާގެ ބައެއް އަލްބަމްތައް އަލުން ރެކޯޑުކޮށް ރިލީޒް ކުރަން ފެށި އެވެ. މި ކަމުގެ ސަބަބުން ލަވަތަކުން ލިބޭ ރޯޔަލްޓީ ސީދާ ޓޭލާއަށް ލިބޭ ގޮތްވެ އާމްދަނީ ބޮޑުތަނުން އިތުރުވި އެވެ.
  • އަލްބަމް ސޭލްސް އަދި ރޯޔަލްޓީ: އޭނާގެ ފަހުގެ އަލްބަމްތައް ކަމަށްވާ "ދަ ޓޯޗާޑް ޕޮއެޓްސް ޑިޕާޓްމަންޓް" ފަދަ އުފެއްދުންތަކަށް ލިބުނު ބޮޑު ތަރުހީބުގެ ސަބަބުން، ރޯޔަލްޓީގެ ގޮތުގައި ގާތްގަނޑަކަށް 800 މިލިއަން ޑޮލަރު އަދި މިއުޒިކް ކެޓަލޮގްގެ އަގު 600 މިލިއަން ޑޮލަރަށް އަރަ އެވެ.
  • ރިއަލް އެސްޓޭޓް: މީގެ އިތުރުން ޓޭލާގެ ނަމުގައި ހުރި އަގުބޮޑު ގެދޮރާއި ބިންތަކުގެ އަގު 110 މިލިއަން ޑޮލަރަށް އަރަ އެވެ.

މި ކާމިޔާބީއާ އެކު ޓޭލާ ސުވިފްޓް ވަނީ ކުރިން މި ލިސްޓުގެ ކުރީގައި ތިބި މަޝްހޫރު ލަވަކިޔުންތެރިން ކަމަށްވާ ރިއާނާ އަދި ބިޔޯންސޭ އަށްވުރެ މައްޗަށް ޖެހިލާފަ އެވެ.

ދުނިޔޭގެ މިއުޒިކް ދާއިރާގައި މިހާރު ޓޭލާއަށްވުރެ ކުރީގައި އުޅެނީ 2.8 ބިލިއަން ޑޮލަރުގެ މިލްކިއްޔާތަކާ އެކު ރެޕް އަދި ވިޔަފާރިވެރިޔާ ޖޭ-ޒީ އެކަންޏެވެ.

ޓޭލާ ސުވިފްޓް މިހާރު ތައްޔާރުވަމުންދަނީ މަޝްހޫރު އެނިމޭޝަން ފިލްމު "ޓޯއީ ސްޓޯރީ 5"އަށް އޭނާ ކިޔައިދީފައިވާ އާ ސިންގަލް ރިލީޒް ކުރުމަށެވެ.