އެމެރިކާއިން އީރާނަށް މިސައިލްގެ ވާރޭ އޮއްސައި އެ ގައުމު ސުންނާފަތިކޮށްލާނެ ކަމަށް އެމެރިކާއިން ބުނެފި އެވެ.

އީރާނާ ދެކޮޅަށް އެމެރިކާއިން ކުރިއަށްގެންދާ ހަރަކާތްތަކަކީ ކާމިޔާބު ކަމެއްގެ ގޮތުގައި ސިފަކުރަމުން، އެމެރިކާގެ އޮފިޝަލުން ވިދާޅުވަމުން ގެންދަވަނީ ތެހެރާންގެ ފުނޑުފުނޑުކޮށްލުމުގެ މަސައްކަތް ވޮޝިންޓަނުން ކުރަމުންދާ ކަމަށެވެ.

ބުދަ ދުވަހު ނޫސްވެރިންނާ ވާހަކަދައްކަވަމުން ޕެންޓަގަންގެ އިސްވެރިޔާ ޕީޓް ހެގްސެތު ވިދާޅުވީ، އީރާނުގައި އާންމުންގެ އެތައް ސަތޭކަ ބަޔަކު މަރުވަމުންދާއިރުވެސް، އެމެރިކާގެ އަސްކަރިއްޔާއިން ހަމަލާދިނުމުގައި ގެންގުޅޭ އުސޫލުތައް ދޫކޮށްލައި، އެއްވެސް ހިފެހެއްޓުމެއް ނެތި އޮޕަރޭޝަންތައް ކުރިއަށްގެންދާ ކަމަށެވެ. "އީރާނުގެ ލީޑަރުންނަށް ކޮންމެ މިނެޓަކުވެސް ފެންނާނީ އެމެރިކާއާއި އިޒްރޭލުގެ ވައިގެ ބާރުވެރިކަން. އަދި އަހަރެމެން މިކަން ނިންމާލަންދެން އީރާނަށް ކުރެވޭނެ އެއްވެސް ކަމެއް ނޯންނާނެ،" ހެގްސެތު ވިދާޅުވި އެވެ.

އޭނާ އިތުރަށް ވިދާޅުވި ގޮތުގައި އީރާނުގެ މަތިން އުދުހެމުންދާ އެމެރިކާގެ ޖެޓްތަކުން ދަނީ ވައިގެ ސަރަހައްދު ކޮންޓްރޯލްކޮށް، އަމާޒުތައްކޮށް އިރާނުގެ އެކި ސަރަހައްދުތަކަށް ހަމަލާދެމުންނެވެ. "މިއީ ދުވަހަކުވެސް ހަމަހަމަ ހަނގުރާމައަކަށް ހެދުމަށް ގަސްދުކުރި ކަމެއް ނޫން، އަދި މިއީ ހަމަހަމަ ހަނގުރާމައެއްވެސް ނޫން. އެމީހުން ބަލިވެފައި ތިއްބައި އަހަރެމެން މިދަނީ އިތުރަށް ހަމަލާދެމުން. މިއީ މިކަން އޮންނަންޖެހޭނެ ސީދާ ގޮތް،" އޭނާ ވިދާޅުވި އެވެ.

އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބާގާއީ ވިދާޅުވީ، ހެގްސެތުގެ ވާހަކަތަކަކީ ހަނގުރާމައިގެ ކުށްތަކަށާއި އިންސާނިއްޔަތާ ހިލާފު ޖަރީމާތަކަށް އިއުތިރާފުވުން ކަމަށެވެ. ބާގާއީ އެކްސްގައި ލިޔުއްވި ގޮތުގައި، ހަމައެކަނި "ނާޒީންގެ ފިކުރުގެ" ބަޔަކަށް ނޫނީ އެމީހުންގެ ވެރިޔާގެ އުންމީދުތައް ފުރިހަމަކުރުމަށްޓަކައި، އެއްވެސް އިހުސާސެއް ނެތި އެހެން ގައުމަކަށް މިފަދަ ބޮޑު ގެއްލުންތަކެއް ނުގެންނާނެ ކަމަށެވެ.

ވައިޓް ހައުސްގެ ތަރުޖަމާނު ކެރޮލީން ލީވިޓްވެސް ވަނީ ހެގްސެތުގެ ވާހަކަތަކަށް ތާއީދުކުރައްވާފަ އެވެ. އޭނާ ވިދާޅުވީ ކުރިއަށް އޮތް މަދު ގަޑިއިރުތަކެއްގެ ތެރޭގައި ވައިގެ ސަރަހައްދުގެ ފުރިހަމަ ބާރުވެރިކަން ހޯދޭނެ ކަމަށާއި، އޭގެ މާނައަކީ އެމެރިކާގެ އަސްކަރިއްޔާއިން އީރާނުގެ މުހިންމު އަމާޒުތަކަށް މިސައިލާއި ހަތިޔާރު ފޮނުވާލުން ކަމަށެވެ.

އީރާނުގެ އޮފިޝަލުން ރިޕޯޓްކޮށްފައިވާ ގޮތުގައި، އެމެރިކާއާއި އިޒްރޭލުން ދަނީ އާންމުން ދިރިއުޅޭ ތަންތަނަށާއި، ސްކޫލްތަކާއި ހޮސްޕިޓަލްތަކަށް ގިނަ ހަމަލާތަކެއް ދެމުންނެވެ. ބާގާއީ ވަނީ މީހުން ދިރިއުޅޭ އިމާރާތްތަކާއި، މާރުކޭޓުތަކާއި ސިއްހީ މަރުކަޒުތަކަށް ދީފައިވާ ހަމަލާތަކުގެ ތަފްސީލީ ލިސްޓެއް ހާމަކުރައްވާފަ އެވެ.

ފެބްރުއަރީ 28 ވަނަ ދުވަހު އީރާނުގެ ދެކުނުގެ ސިޓީއެއް ކަމަށްވާ މިނާބްގައި ހުރި އަންހެން ކުދިންގެ ސްކޫލަކަށް ދިން ހަމަލާއެއްގައި 165 މީހުން މަރުވި އެވެ. މިކަމާ ގުޅޭގޮތުން ލީވިޓް ވިދާޅުވީ ޕެންޓަގަނުން އެ ހާދިސާ ތަހުގީގު ކުރަމުންދާ ކަމަށާއި، އެމެރިކާގެ އަސްކަރިއްޔާއިން އާންމުންނަށް އަމާޒުކޮށް ހަމަލާނުދޭނެ ކަމަށެވެ. ނަމަވެސް ޕެންޓަގަނުން ދެއްކި ޗާޓުތަކުން ފެންނަ ގޮތުގައި، ހަނގުރާމައިގެ ފުރަތަމަ 100 ގަޑިއިރުގެ ތެރޭގައި އެ ސަރަހައްދަށް ދެ ހަމަލާއެއް ވަނީ ދީފަ އެވެ.

އެމެރިކާއާއި އިޒްރޭލުން ވަނީ އީރާނުގެ ރޫހާނީ ލީޑަރު ޢަލީ ޚާމަނާއީ އާއި އިސް އޮފިޝަލުން އަވަހާރަކޮށްލާފަ އެވެ. އަދި އީރާނުގެ އުޅަނދުތަކަށާއި އަސްކަރީ މަރުކަޒުތަކަށްވެސް ދަނީ ހަމަލާދެމުންނެވެ. މި ހަނގުރާމަ މުޅި ސަރަހައްދަށް ފެތުރިފައިވާއިރު، އީރާނުންވެސް ދަނީ ގަލްފު ސަރަހައްދުގެ އާންމު ތަންތަނަށާއި ހަކަތަ އުފައްދާ މަރުކަޒުތަކަށް ހަމަލާދޭ ކަމަށް ތުހުމަތު ކުރެވެމުންނެވެ.

އެތައް ހާސް ހަމަލާތަކެއް ދިން ނަމަވެސް، އީރާނުގެ ސަރުކާރު އަދިވެސް ދެމިއޮތްއިރު، އެތެރޭގެ އެއްވެސް ގޮންޖެހުމެއް އުފެދިފައެއް ނުވެ އެވެ. މުޅި މެދުއިރުމަތީގައި ހިތާމައާއި، ސުންނާފަތިވުމާއި، މީހުން ހާލުގައި ޖެހުން އިތުރުވަމުންދާއިރުވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ މި ހަނގުރާމައަށް ތައުރީފު ކުރައްވާފަ އެވެ. ޓްރަމްޕް ވިދާޅުވި ގޮތުގައި ހަނގުރާމައިގެ މައިދާނުގައި އެމެރިކާ ދަނީ ވަރަށް ބޮޑު ކާމިޔާބީއެއް ހޯދަމުންނެވެ. "1 އަކުން 10 އަކާ ދެމެދުގެ މިންގަނޑަކުން ބަލާނަމަ، އަހަރެން މިކަމަށް ދޭނީ 15،" ޓްރަމްޕް ވިދާޅުވި އެވެ.