މި ސަރުކާރުގެ "އާއިލީ ބޯހިޔާވަހިކަން" ޕްރޮގްރާމުގައި ހިމެނޭ ހާއްސަ ކެޓަގަރީތަކަށް ފްލެޓަށް ކުރިމަތިލެވޭ ޝަރުތުތައް އިސްލާހުކުރުމާ އެކު، ކޮންމެ ކެޓަގަރީއަކަށް ދޫކުރުމަށް ކަނޑައަޅާފައިވާ ފްލެޓުގެ އަދަދުތައް ހައުސިން މިނިސްޓްރީން މިއަދު އާންމުކޮށްފި އެވެ.

ފްލެޓު ދިނުމުގެ އުސޫލަށް ގެނައި މި އިސްލާހުތަކާ އެކު، ހާއްސަ ކެޓަގަރީތަކަށް ޖުމްލަ 1،000 ފްލެޓު ވަނީ ކަނޑައަޅާފަ އެވެ.

މިނިސްޓްރީން އާންމުކުރި އިއުލާނުގައިވާ ގޮތުން، ބޯހިޔާވަހިކަން ފޯރުކޮށްދިނުމުގައި ހާއްސަ އިސްކަންދެވޭ އިދާރާތަކާއި މުއައްސަސާތަކުގެ ތެރެއިން ފަސް ދާއިރާއަކަށް ވަކިވަކިން ފްލެޓުތައް ވަނީ ބަހާލާފަ އެވެ. އެގޮތުން ސިވިލް ސާވިސްގެ މުވައްޒަފުންނަށް 200 ފްލެޓު ކަނޑައަޅާފައިވާއިރު، ޖުޑިޝަރީ، ފުލުހުން، އެމްއެންޑީއެފް އަދި ކަރެކްޝަންސް ސާވިސްގެ ތެރެއިން ކޮންމެ އިދާރާއަކަށް 100 ފްލެޓު ވަނީ ހާއްސަކޮށްފަ އެވެ.

މި ކެޓަގަރީތަކުން ފްލެޓަށް ޝަރުތު ހަމަވުމުގެ އަސާސީ މިންގަނޑަކީ މާލޭގައި އާއިލާ ބިނާވެފައިވުމާ އެކު، އެ އިދާރާއެއްގައި މެދުނުކެނޑި ފުލްޓައިމްކޮށް މަސައްކަތްކުރާތާ އެއް އަހަރު ވެފައިވުމެވެ. މީގެ އިތުރުން، ބޯހިޔާވަހިކަން ހަވާލުކުރާ ތާރީހުން ފެށިގެން އެ އިދާރާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހޭނެ ކަމަށް މިނިސްޓްރީން ބުނެފައިވެ އެވެ.

މަތީގައި ބަޔާންކުރި ފަސް އިދާރާގެ އިތުރުން، ދައުލަތުގެ އިތުރު 24 މުއައްސަސާއެއްގައި މަސައްކަތްކުރާ މީހުންނަށް ޖުމްލަ 400 ފްލެޓު ވަނީ ކަނޑައަޅާފަ އެވެ. މީގެ ތެރޭގައި ރައީސް އޮފީސް، ރައްޔިތުންގެ މަޖިލީހުގެ އިދާރާ، މިނިވަން މުއައްސަސާތައް، އެމްއެމްއޭ އަދި މީރާ ފަދަ ތަންތަން ހިމެނެ އެވެ. މި ކެޓަގަރީގެ މުވައްޒަފުންނަށް ވެސް ޝަރުތު ހަމަވާނީ މާލޭގައި އާއިލާ ބިނާވެފައިވުމާއި، އެއް އަހަރު ދުވަހުގެ މަސައްކަތު ތަޖުރިބާ ހުރުމުންނެވެ.

މިނިސްޓްރީން ބުނި ގޮތުގައި، ކޮންމެ އިދާރާއަކަށް ކަނޑައަޅާފައިވާ ފްލެޓުތައް ލިބޭނެ މީހުން ކަނޑައަޅާނީ ޝަރުތު ހަމަވާ މީހުންގެ ތެރެއިން އެ އިދާރާއަކުން ކަނޑައަޅާ ވަކި އުސޫލެއްގެ ދަށުންނެވެ. "އާއިލީ ބޯހިޔާވަހިކަން" ޕްރޮގްރާމްގެ ދަށުން ޖުމްލަ 7،900 ފްލެޓާއި 15،000 ގޯތި ދޫކުރުމަށް ވަނީ ނިންމާފަ އެވެ.

މި ޕްރޮގްރާމަށް ކުރިމަތިލެވޭނީ މާލޭގެ ރައްޔިތުންނާއި މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށެވެ. ގޯއްޗާއި ފްލެޓަށް އެދި ފޯމު ހުށަހެޅުމުގެ އެންމެ ފަހު ތާރީހަކީ އަންނަ އޭޕްރިލް މަހުގެ 30 ވަނަ ދުވަހެވެ.