އީރާނާއެކު ކުރިއަށްދާ މަޝްވަރާތައް ހޯމަ ދުވަހު ފެށޭނެ ކަމަށާއި، ނަމަވެސް އެއްބަސްވުމަކަށް އައުމަށް ވަކި ސުންގަޑިއެއް ކަނޑަނާޅުއްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ހޮރްމޫޒް ކަނޑުއޮޅި އަލުން ހުޅުވައި، އީރާނުގެ ނިއުކްލިއާ މައްސަލައަށް އަވަސް ހައްލެއް ހޯދުމުގެ އުންމީދުގައި، އީރާނަށް ދޭން އުޅުނު ވަރުގަދަ ހަމަލާއެއް މަޑުޖައްސާލާފައިވާ ކަމަށް ވިދާޅުވުމަށްފަހު، ޓްރަމްޕް ވިދާޅުވީ އީރާނާއެކު ބާއްވާ މަޝްވަރާތައް ހޯމަ ދުވަހު ފެށޭނެ ކަމަށެވެ.

ޓްރަމްޕްގެ "ޓްރުތު ސޯޝަލް" ޕްލެޓްފޯމުގައި ހޮނިހިރު ދުވަހުގެ ރޭ ވިދާޅުވީ، ހޮރްމޫޒް ކަނޑުއޮޅި ވަގުތުން، ފުރިހަމައަށް ހުޅުވައިލުމަށާއި އީރާނުގެ ނިއުކްލިއާ ނުރައްކާ ނައްތާލުމަށް ބޭނުންވާ އެއްބަސްވުމަކަށް ދިއުމަށްޓަކައި، އީރާނާއި މެދުއިރުމަތީގެ އެހެން ގައުމުތަކުން އިތުރު ވަގުތަށް އެދިފައިވާ ކަމަށެވެ. ނަމަވެސް އީރާނުން އަވަސް ފުރުސަތެއްގައި އެއްބަސްވުމަކަށް އަންނަންޖެހޭނެ ކަމަށް އޭނާ ފާހަގަކުރެއްވި އެވެ.

ނިއު ޖާޒީގައި ހަފުތާ ބަންދު ހޭދަކުރެއްވުމަށްފަހު ވޮޝިންގްޓަނަށް ވަޑައިގެން، އާދީއްތަ ދުވަހު ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ ހޯމަ ދުވަހުގެ މެންދުރުފަހު މަޝްވަރާތައް ފެށޭނެ ކަމަށެވެ. އެހެންނަމަވެސް، މި މަޝްވަރާތައް ކުރިއަށްދާނީ ކޮން ތަނެއްގައި ކަމެއް ނުވަތަ ބައިވެރިވާނީ ކޮން ބައެއް ކަމެއް އޭނާ ހާމައެއް ނުކުރައްވަ އެވެ.

އީރާނުން އެއްބަސްވުމަކަށް އައުމަށް ވަކި ސުންގަޑިއެއް އޮތްތޯ ސުވާލުކުރުމުން، ޓްރަމްޕް އެއަށް ސީދާ ޖަވާބެއް ނުދެއްވަ އެވެ. "އަހަރެން ބޭނުމީ އެއްބަސްވުމަކަށް ދާން. އަހަރެން މީހުން މަރާކަށް ބޭނުމެއް ނޫން. މީހުން މަރުވުމަކީ ވަރަށް ގިނަ ބަޔަކު މަރުވާ ކަމެއް، އަދި އަހަރެމެން އެގޮތެއް ބޭނުމެއް ނުވޭ،" އެ ސުވާލަށް ޖަވާބު ދެއްވަމުން ޓްރަމްޕް ވިދާޅުވި އެވެ.

ފެބްރުއަރީ މަހުގެ ފަހުކޮޅު އިޒްރޭލާ ގުޅިގެން އީރާނާ ދެކޮޅަށް ފެށި ހަނގުރާމަ ވަރުގަދަކުރާނެ ކަމުގެ އިންޒާރު ޓްރަމްޕް ތަކުރާރުކޮށް ދެއްވަމުން ގެންދެވި ނަމަވެސް، މަޝްވަރާ ކުރުމަށް އޭނާ ދަނީ އިތުރު ފުރުސަތުތައް ދެއްވަމުންނެވެ. އެހެންނަމަވެސް، މިހާތަނަށް ކުރެވުނު މަޝްވަރާތަކުން ފުރިހަމަ އެއްބަސްވުމަކަށް އާދެވިފައެއް ނުވެއެވެ.

ދެ ފަރާތުގެ މެދުގައި ދެމުންދިޔަ ހަމަލާތަކުގެ އިންޒާރުތަކަށްފަހު، މަޝްވަރާގެ މަގު ޓްރަމްޕް އިހްތިޔާރު ކުރެއްވުމަކީ މި ހަނގުރާމައިގައި ފެނިގެންދިޔަ އާ ބަދަލެކެވެ. މި ހަމަލާތައް މިހާރު ވަނީ ގަލްފު ސަރަހައްދުން ރަތް ކަނޑަށާއި، މިސްރުގައި ހުރި މެޑިޓެރޭނިއަން ސަރަހައްދުގެ ވަސީލަތްތަކަށްވެސް ފެތުރިފަ އެވެ.

ދުނިޔޭގެ ތެލާއި ގޭހުގެ 20 އިންސައްތަ އުފުލާ މުހިންމު މަގު ކަމަށްވާ ހޮރްމޫޒް ކަނޑުއޮޅި އީރާނުން ބަންދުކުރުމާ ގުޅިގެން، ހަކަތައިގެ އަގުތައް އުފުލި، ދުނިޔޭގެ އިގްތިސާދަށް ވަނީ ނޭދެވޭ އަސަރުތަކެއް ކޮށްފަ އެވެ. އީރާނުން ނިއުކްލިއާ ހަތިޔާރު ހޯދުން ހުއްޓުވުމަށްޓަކައި ތެލުގެ އަގު ވަގުތީ ގޮތުން އުފުލުނު ނަމަވެސް އެއީ ކުރަންޖެހޭ ކަމެއް ކަމަށް ޓްރަމްޕް ވިދާޅުވި ނަމަވެސް، އިގްތިސާދީ ދަތިތަކުގެ ސަބަބުން މި މައްސަލަ ހައްލުކުރުމަށް އޭނާއަށް ވަނީ ސިޔާސީ ގޮތުން ބޮޑެތި ފިއްތުންތަކެއް ކުރިމަތިވެފަ އެވެ.

ހޯމަ ދުވަހުގެ ހެނދުނު ބާޒާރު ހުޅުވުނުއިރު، ތެލުގެ އަގު ވަނީ 4 އިންސައްތައަށްވުރެ ބޮޑަށް ދަށަށް ގޮސްފަ އެވެ.

އީރާނުގެ ހާރިޖީ މަސައްކަތްތައް

އީރާނުގެ ހާރިޖީ ވަޒީރު އައްބާސް އަރަގްޗީ ވަނީ ސައުދީ އަރަބިއްޔާގެ ހާރިޖީ ވަޒީރު ފައިސަލް ބިން ފަރްހާން އާއި ޕާކިސްތާނުގެ ސިފައިންގެ ވެރިޔާ އާސިމް މުނީރާ ފޯނުން ގުޅުއްވައި، ސުލްހައިގެ މަސައްކަތްތަކާ ބެހޭގޮތުން މަޝްވަރާ ކުރައްވާފަ އެވެ. އީރާނުގެ ރަސްމީ ނޫސް އޭޖެންސީ (އައިއާރުއެންއޭ) އިން ރިޕޯޓްކޮށްފައިވާ ގޮތުގައި، ހޮރްމޫޒް ކަނޑުއޮޅިއާ ގުޅޭގޮތުން އީރާނާއި އޮމާނާ ދެމެދު ކުރިއަށްދާ މަޝްވަރާތައް މިހާރު އޮތީ އެންމެ ފަހު މަރުހަލާގަ އެވެ.

އީރާނުގެ ހާރިޖީ ވުޒާރާގެ ތަރުޖަމާނު އިސްމާއީލް ބަގާއީ ވިދާޅުވީ، މަޝްވަރާތައް ބިނާވެފައިވަނީ ކަނޑުއޮޅި މެދުވެރިކޮށް ދަތުރުކުރާނެ އާ މަގަކާ ބެހޭގޮތުން ކަމަށާއި، މިއީ ކަނޑުއޮޅި ހުޅުވުން ނުވަތަ ބަންދުކުރުމާ ގުޅުންހުރި ކަމެއް ނޫން ކަމަށެވެ. އެއީ މުޅިން ތަފާތު މައުޟޫއެއް ކަމަށް އޭނާ ފާހަގަކުރެއްވި އެވެ.

ނިމިދިޔަ މަހު އީރާނުން ވަނީ އޮމާނުން ހުށަހެޅި، ގަލްފުގެ ގައުމުތަކުން ތާއީދުކުރި ހުށަހެޅުމަކަށް އިންކާރުކޮށްފަ އެވެ. އެ ހުށަހެޅުމަކީ ކަނޑުއޮޅި ބޭނުންކުރާ ފަރާތްތަކުން އަމިއްލައަށް އެދިގެން ފީއެއް ދައްކާ ގޮތަށް އެ ސަރަހައްދު ބެލެހެއްޓުމުގެ މަޝްރޫއެކެވެ.

އިޒްރޭލުގެ އެނާޖީ މިނިސްޓަރު އެލީ ކޯހެން ވިދާޅުވީ، ސަރަހައްދުގައި ހިނގަމުންދާ ކަންކަމާ ގުޅޭގޮތުން އިޒްރޭލާއި އެމެރިކާއާ ދެމެދު ވަރަށް ގާތް ސަލާމަތީ އަދި ޖާސޫސީ ގުޅުމެއް އޮންނަ ކަމަށެވެ. ނަމަވެސް އޭނާ އިތުރަށް ވިދާޅުވީ، އެއްބަސްވުމެއް އޮތަސް ނެތަސް، އީރާނުން އެގައުމުގެ ނިއުކްލިއާ ޕްރޮގްރާމް ކުރިއަށް ގެންދަން އުޅެފިނަމަ، އިޒްރޭލުން ހަމަލާދީ އެކަން ހުއްޓުވާނެ ކަމަށެވެ.

ރައީސް ޓްރަމްޕާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަންގާރަ ދުވަހު ވޮޝިންގްޓަނުގައި ބައްދަލުކުރިއިރު، އީރާނުގެ ނިއުކްލިއާ މަސައްކަތް ހުއްޓުވުމަށް ހުރި ހުރިހާ ގޮތްތަކަކާ ބެހޭގޮތުން މަޝްވަރާކުރިކަމަށް އިޒްރޭލުގެ އޮފިޝަލަކު ބުނެފައިވެ އެވެ. އީރާނުން އަދިވެސް ދަނީ އެގައުމުން ނިއުކްލިއާ ހަތިޔާރު އުފައްދަން މަސައްކަތް ކުރާ ކަމަށް ބުނާ ވާހަކަތައް ދޮގުކުރަމުންނެވެ.