އެއްގަމު އުޅަނދު ފަހަރުގައި ނުވަތަ ކަނޑު މަތީގައި ދަތުރު ކުރާއިރު މޭނުބައިކޮށް، ބޯއަނބުރައި، އަދި ހޮޑު ލެވުމަކީ ގިނަ ބަޔަކަށް ކުރިމަތިވާ ކަމެކެވެ. މިއީ "މޯޝަން ސިކްނެސް" ނުވަތަ ދަތުރުފަތުރު ކުރާއިރު ވާ ބަލިކަމުގެ ތެރޭގައި ހިމެނޭ ވަރަށް އާންމު ކަމެކެވެ.

ސިއްހީ މާހިރުންނާއި ޑޮކްޓަރުން ހާމަކުރައްވާ ގޮތުގައި، މިކަން ދިމާވަނީ ހަރަކާތްތަކާ ބެހޭގޮތުން އިންސާނާގެ ސިކުނޑިއަށް ލިބޭ ސިގްނަލްތައް އެއްގޮތްނުވެ ފުށު އެރުމުންނެވެ.

ދަތުރުމަތީގައި މޭނުބައިކުރާ ހަގީގީ ސަބަބު

އުޅަނދެއްގައި ދަތުރުކުރާއިރު، ހަށިގަނޑު ހުރި ހާލަތު ދެނެގަތުމަށް ސިކުނޑިއަށް މައުލޫމާތު ފޮނުވަނީ ތިން ގޮތަކުންނެވެ

ކަންފަތުގެ އެތެރެ: ކަންފަތުގެ އެތެރޭގައިވާ "ވެސްޓިބިއުލަރ ސިސްޓަމް"އިން އުޅަނދުގެ ތެޅުމާއި، ލެނބުންތަކާއި، އަދި ދުވެލި ވަރަށް ސާފުކޮށް އިހުސާސްކޮށް ސިކުނޑިއަށް ސިގްނަލް ފޮނުވަ އެވެ.

ލޯ: ކާރުގެ ތެރޭގައި ހުންނަ ގޮނޑިތަކަށް ނުވަތަ ސީލިންގަށް ބަލައިގެން އިންނަނަމަ، ލޮލަށް ފެންނަނީ ހުއްޓިފައިވާ މާހައުލެކެވެ. އެހެންވެ ލޮލުން ސިކުނޑިއަށް ފޮނުވާ ސިގްނަލަކީ "ހަށިގަނޑު ހުރީ ހުއްޓިގެން" ކަމަށެވެ.

ނާރުތަކާއި މަސްތައް: ހަށިގަނޑުގެ މަސްތަކާއި އުޅަނދުގެ ގޮނޑީގައި ޖެހިފައިވާ ބައިތަކަށް އުޅަނދުގެ ތެޅުން އިހުސާސްވެ އެވެ.

މިގޮތަށް ކަންފަތުން ހަށިގަނޑު ހަރަކާތްތެރިވާކަމަށް ބުނާއިރު، ލޮލުން ހަށިގަނޑު ހުއްޓިފައިވާކަމަށް ސިގްނަލް ފޮނުވުމުން ސިކުނޑި އޮޅުންބޮޅުންވެ އެވެ. މި ފުށުއެރުމުގެ ސަބަބުން ސިކުނޑިން ނިންމަނީ ހަށިގަނޑަށް ވިހައެއް އެތެރެވީ ކަމަށެވެ. އަދި އެ ވިހައެއް ބޭރު ކުރުމުގެ ނިޒާމެއްގެ ގޮތުން މޭ ނުބައިކުރުވައި ހޮޑު ލަވަނީ އެވެ.

ދަތުރުމަތީގައި މޭނުބައިކުރުން ހުއްޓުވުމަށް 8 އިރުޝާދެއް

1. ކުރިމަތިން ދުރު މަންޒަރުތަކަށް ބެލުން: ކާރުގެ ކުރީގެ ކުޑަދޮރުން ބޭރުގައިވާ ދުރު މަންޒަރުތަކަށް ނުވަތަ އުދަރެހަށް ބަލާށެވެ. މީގެ ސަބަބުން ހަށިގަނޑު ހަރަކާތްތެރިވާކަން ލޮލަށްވެސް އިހުސާސްވެ ސިގްނަލްތައް އެއްގޮތްވާނެ އެވެ.

2. އިށީންނާނެ ރަނގަޅު ތަނެއް ހިޔާރު ކުރުން: ކާރުގައިނަމަ ކުރީ ގޮނޑީގައި އިށީންނާށެވެ. ބޯޓުގައިނަމަ ފިޔަގަނޑާ ދިމާލު ގޮނޑިއެއް، އަދި ކަނޑު އުޅަނދެއްގައިނަމަ މެދުތެރެއިން ތެޅުން ކުޑަ ހިސާބެއް ހިޔާރު ކުރާށެވެ.

3. ކުޑަދޮރު ތަންކޮޅެއް ހުޅުވާލުން ނުވަތަ އޭސީ ރަނގަޅު ކުރުން: މޫނަށް ސާފު ފިނިވައި ޖެހޭ ގޮތް ހެދުމުން ނުވަތަ އުޅަނދުގެ ތެރޭގައި ވައި ދައުރުވާނެ ގޮތް ހެދުމުން މޭ ނުބައިކުރުން ވަގުތުން ކުޑަކޮށްދެ އެވެ.

4. ބޯ އެއްތަނެއްގައި ހިފެހެއްޓުން: ދަތުރު ކުރާއިރު ބޯ މާބޮޑަށް ތެޅުނަނުދީ، ގޮނޑީގެ ސީޓުގައި ބޯ ހަމަޖައްސާލައިގެން އިނުން މުހިންމެވެ.

5. ލޯ މަރާލުން ނުވަތަ ނިދާލުން: ލޯ މަރާލުމުން ލޮލުން ސިކުނޑިއަށް ފޮނުވާ ފުށުއަރާ ސިގްނަލްތައް ހުއްޓި، މޭނުބައިކުރުން ކުޑަ ވެގެންދެ އެވެ.

6. ދަތުރުގެ ކުރިން ބަރު ކާނާއާއި ތެޔޮ އެއްޗެހި ނުކެއުން: ދަތުރު ކުރުމުގެ ކުރިން މާ ބޮޑަށް ބަނޑު ފުރެންދެން ކޭންބުއިމާއި، ތެޔޮ އަދި ކެރަމަލް ގިނަ ކާނާ ބޭނުން ކުރުމުން ދުރުހެލިވާށެވެ.

7. އިނގުރު ނުވަތަ ކާފޫރުތޮޅި ބޭނުން ކުރުން: އިނގުރަކީ މޭނުބައިކުރުން ހުއްޓުވުމަށް ވަރަށް ރަނގަޅު ގުދުރަތީ ފަރުވާއެކެވެ. ދަތުރުމަތީގައި އިނގުރު މެޓައެއް، އިނގުރު ސައި ނުވަތަ ކާފޫރުތޮޅިއެއް ކެއުމަކީ އެހީ އެކެވެ.

8. މޯޝަން ސިކްނެސް ބޭސް ކެއުން: މިއީ އާންމުކޮށް ވަރަށް ބޮޑަށް ދިމާވާ ކަމެއްނަމަ، ދަތުރު ފެށުމުގެ 30-60 މިނެޓު ކުރިން މޯޝަން ސިކްނެސްއަށް ހާއްސަ ބޭހެއް (ޑޮކްޓަރެއްގެ އިރުޝާދާއެކު) ބޭނުން ކުރާށެވެ.