ތައިލެންޑުގެ ޕަޓާޔާގައި ފޮއްޓެއްގެ ތެރެއިން ފެނުނު 17 އަހަރުގެ އަންހެން ކުއްޖާގެ މަރުގެ މައްސަލައިގައި އޮސްޓްރޭލިއާގެ ރައްޔިތަކު ހައްޔަރުކޮށް، މީހަކު މެރުމުގެ ދައުވާ ވަނީ އުފުލައިފި އެވެ.

ތައިލެންޑު ފުލުހުން ބުނި ގޮތުގައި، ބެންކޮކާ ގާތްގަނޑަކަށް 150 ކިލޯމީޓަރު އިރުމަތީގައި އޮންނަ ޕަޓާޔާގައި ހިނގި މި މަރުގެ ހާދިސާއާ ގުޅިގެން، އުމުރުން 40 އަހަރުގެ އޮސްޓްރޭލިއާ ފިރިހެނަކު ހޮނިހިރު ދުވަހުގެ ފަތިހު ބެންކޮކްގެ ސުވަރުނަބޫމީ އެއާޕޯޓުން ވަނީ ހައްޔަރުކޮށްފަ އެވެ.

ސީސީޓީވީ ފުޓޭޖްތަކުން ފެންނަ ގޮތުގައި، ކާމަން ނަމަކަށް ކިޔާ މި މީހާ އެ އަންހެން ކުއްޖާއާއެކު އެޕާޓްމަންޓް އިމާރާތަކަށް ވަދެ އެވެ. އަދި އޭގެ ގަޑިއިރުތަކެއް ފަހުން އޭނާ އެކަނި ނުކުމެގެން ދަނީ ފޮއްޓެއް ހިފައިގެންނެވެ. ތައިލެންޑް ފުލުހުންގެ ރަސްމީ ފޭސްބުކް ޕޭޖުގައި ބުނެފައިވާ ގޮތުގައި، އޭނާ އެ ފޮށި ސައިކަލަކަށް އަރުވައިގެން ގޮސް، ރޭލު ދަގަނޑު ކައިރީގައި އޮތް ވިނަގަނޑެއްގެ ތެރެއަށް އެއްލާލަ އެވެ. ފުލުހުން އޭނާ ހައްޔަރުކުރީ އޮސްޓްރޭލިއާއަށް ދިއުމަށް ފުރަން ތައްޔާރުވެފައި ވަނިކޮށް އެއާޕޯޓުންނެވެ.

ކޯޓަށް ހާޒިރުކުރުމުގެ ކުރިން ފުލުހުންގެ ތަހުގީގު ކޮޓަރީގައި ހުރެ ކާމަން ވަނީ މަރުވި ކުއްޖާގެ އާއިލާއަށް މެސެޖެއް ދީފަ އެވެ. އޭނާ ބުނި ގޮތުގައި، އެ ކުއްޖާއަށް ދިމާވި ކަންތަކާ މެދު އޭނާ ދެރަވެ އެވެ. ނަމަވެސް އެއީ އޭނާގެ ބާރުގެ ދަށުގައި އޮތް ކަމެއް ނޫން ކަމަށް އޭނާ ބުންޏެވެ.

މަރުވި ކުއްޖާގެ ބައްޕަ، އުމުރުން 46 އަހަރުގެ ތޮންގްޗައި ޑޮންހޮމްލާ ބުނި ގޮތުގައި، މި ލިބުނު ކުއްލި ސޮކުން އަދިވެސް އޭނާއަށް އަރައެއް ނުގަނެވެ އެވެ. "އަހަރެން މިހުރީ ވަރަށް ބޮޑަށް ދެރަވެފައި. މަގޭ ދަރިފުޅުގެ މަންމައެއް ނުހުރޭ. އެހެންވެ އޭނާ ބޭނުންވާ ކޮންމެ ކަމެއް އަމިއްލައަށް ހޯދާނެ، އަދި އަބަދުވެސް އަހަންނަށް އެހީތެރިވެދޭނެ،" އޭނާ ބުންޏެވެ.

އެ ކުއްޖާގެ ދޮންމަންމަ އޮރަދީ ބުސަރަކުމް ބުނީ، ކުށްވެރިޔާއަށް އެންމެ ހަރުކަށި އަދަބު ދޭން ބޭނުންވާ ކަމަށެވެ. "އަހަރެން ފުލުހުން ގާތު ބުނިން އޭނާ މަރަން ބޭނުންވާ ކަމަށް. ދޮންމަންމައެއްގެ ހައިސިއްޔަތުން އިތުރަށް ބުނާނެ އެއްޗެއް ނޭނގެ. އަހަރެން ބޭނުންވަނީ އޭނާ ކުރި ކުށުގެ ފުރިހަމަ އަދަބު ލިބުމަށް،" އޭނާ ބުންޏެވެ.

މި މައްސަލައިގައި ކާމަން ކޯޓަށް ހާޒިރުކުރާނެ ވަގުތެއް ފުލުހުން އަދި ހާމައެއް ނުކުރެ އެވެ.