ކޮލީން ހޫވާގެ މަޝްހޫރު ވާހަކަ ފޮތަށް ބިނާކޮށް އުފެއްދި ހޮލީވުޑް ފިލްމު "އިޓް އެންޑްސް ވިތު އަސް" ބޮކްސް އޮފީހުގައި ބޮޑު ކާމިޔާބީއެއް ހޯދި ނަމަވެސް، ފިލްމުގެ ފަހަތުގައި ހިނގަމުންދިޔަ ކަންތައްތަކަކީ މާ ހަލަބޮލި ކަންތައް ތަކެކެވެ.

ފިލްމުގެ ލީޑް ބަތަލާ އަދި ޕްރޮޑިއުސަރު ބްލޭކް ލައިވްލީ އާއި، ފިލްމުގެ ޑައިރެކްޓަރު އަދި ބަތަލު ޖަސްޓިން ބަލްޑޯނީގެ މެދުގައި އުފެދުނު ގާނޫނީ އަދި އުފެއްދުންތެރިކަމުގެ ބޮޑު ދެބަސްވުން މިވަނީ އެންމެ ފަހުން ނިމުމަކަށް އައިސްފަ އެވެ.

އެންމެ ހައިރާން ކުރުވަނިވި ކަމަކީ، މި ގާނޫނީ ހަނގުރާމަ ނިމިގެން ދިޔައިރު، ދެ ފަރާތުންވެސް މިވަނީ މިއީ އެމީހުންނަށް ލިބުނު "ކާމިޔާބީއެއް" ކަމަށް ބުނެފައި ވުމެވެ.

ދެބަސްވުން އުފެދެން މެދުވެރިވި ސަބަބު

މި ދެ ތަރިންގެ މެދުގައި މައްސަލަ ހޫނުވީ ފިލްމުގެ "ފައިނަލް ކަޓް" ނުވަތަ އެންމެ ފަހުން ސިނަމާތަކަށް ނެރޭނެ އެޑިޓާ ގުޅޭ ގޮތުންނެވެ. ޑައިރެކްޓަރު ޖަސްޓިން ބަލްޑޯނީ ބޭނުންވީ އޭނާ އަމިއްލައަށް ތައްޔާރުކުރި އެޑިޓް ބޭނުން ކުރުމަށެވެ. ނަމަވެސް، ބްލޭކް ލައިވްލީ އާއި އޭނާގެ ފިރިމީހާ (މަޝްހޫރު އެކްޓަރު ރަޔަން ރޭނޮލްޑްސް) ވަނީ ފިލްމުގެ ބައެއް މަންޒަރުތައް އަލުން އެޑިޓްކޮށް، ތަފާތު ވާޝަނެއް ތައްޔާރުކޮށްފަ އެވެ. ސިނަމާތަކަށް ނެރުނީ ބްލޭކް ބޭނުންވި ވާޝަނެވެ.

މީގެ އިތުރުން، ފިލްމުގެ ޕްރޮމޯޝަންގެ ދުވަސްވަރު ވެސް މި ދެ ތަރިން އެކުގައި އެއްވެސް އިންޓަވިއުއަކުން ނުވަތަ ރެޑް ކާޕެޓަކުން ފެނިފައެއް ނުވެ އެވެ. މިއާއެކު ދެފަރާތުގެ މެދުގައި ގާނޫނީ ގޮތުން ލިޔެކިޔުންތައް ބަދަލުކުރެވެން ފެށި އެވެ.

ދެފަރާތުންވެސް ކާމިޔާބީއަށް ދައުވާކުރަނީ ކީއްވެ؟

ރިޕޯޓްތައް ބުނާގޮތުން، ދެ ފަރާތުގެ ގާނޫނީ ޓީމުން ވާހަކަ ދައްކައިގެން މައްސަލަ ކޯޓުން ބޭރުގައި ހައްލު ކުރިއިރު، ދެމީހުންނަށް ވެސް ބޭނުންވި ބައެއް ކަންކަން ވަނީ ހާސިލުވެފަ އެވެ.

ބްލޭކް ލައިވްލީގެ ކާމިޔާބީ: ފިލްމުގެ ކްރިއޭޓިވް ކޮންޓްރޯލް އޮތީ އޭނާގެ އަތުގަ އެވެ. ސިނަމާތަކަށް އައީ އޭނާ ބޭނުންވި އެޑިޓެވެ. އަދި ފިލްމަށް ބޮކްސް އޮފީހުގައި 340 މިނިއަނަށްވުރެ ގިނަ ޑޮލަރުގެ އާމްދަނީއެއް ލިބި، އޭނާގެ ޕްރޮޑަކްޝަން ބާރު ވަނީ ގަދަވެފަ އެވެ.

ޖަސްޓިން ބަލްޑޯނީގެ ކާމިޔާބީ: ގާނޫނީ އެއްބަސްވުމުގެ ދަށުން، ފިލްމުގެ ޑައިރެކްޓަރުގެ ގޮތުގައި އޭނާގެ ނަން ދެމި އޮންނާނެ އެވެ. އަދި ފިލްމުގެ ބޮޑު ކާމިޔާބީއިން އޭނާގެ ކުންފުންޏަށް ލިބެންޖެހޭ މާލީ ފައިދާއާއި ރޯޔަލްޓީސް ފުރިހަމައަށް ލިބޭނެކަން ވަނީ ގާނޫނީ ގޮތުން ކަށަވަރު ކޮށްފަ އެވެ.

ސީކުއަލްއެއް ފެންނާނެތަ؟

މި ވާހަކައިގެ ދެވަނަ ބައި ކަމަށްވާ "އިޓް ސްޓާޓްސް ވިތު އަސް" ފިލްމަކަށް ހަދާނެތޯ ސަޕޯޓަރުން ސުވާލު ކުރާއިރު މި ދެ ތަރިންގެ ގުޅުން ހުރި ގޮތުން އެކުގައި ދެން މަސައްކަތް ކުރުމަކީ ދުރު ކަމެކެވެ.

ބައެއް ރިޕޯޓްތައް ބުނާ ގޮތުން ޖަސްޓިން ބަލްޑޯނީ ބޭނުންވަނީ ދެވަނަ ބައިގެ ހުރިހާ ބާރެއް ބްލޭކްއަށް ދޫކޮށްލާށެވެ.

ހޮލީވުޑްގައި މިފަދަ ބޮޑެތި ކޯޅުންތަކަކީ އާންމު ކަންކަމެވެ. ނަމަވެސް "އިޓް އެންޑްސް ވިތު އަސް" ގެ މައްސަލަ ހަމައަކަށް އެޅުމަކީ ސޮނީ ޕިކްޗާސްއަށާއި ފިލްމުގެ ސަޕޯޓަރުންނަށް ލިބުނު ބޮޑު ހިތްހަމަޖެހުމެކެވެ.