ބޮލީވުޑްގެ އެންމެ ކާމިޔާބު އަދި އެންމެ މަގުބޫލު އެކްޓަރުންގެ ތެރޭގައި ހިމެނޭ ކެޓްރީނާ ކައިފް އަކީ އޭނާގެ ކެރިއަރުގައި އެތައް ހިޓް ފިލްމުތަކެއް ކުޅެފައިވާ ތަރި އެކެވެ.

ނަމަވެސް، ފިލްމީ ދުނިޔޭގައި ބައެއް ފަހަރު ތަރިންނަށް ހެދޭ ގޯސް ނިންމުންތަކުގެ ސަބަބުން، އަތަށް އަންނަ ބޮޑެތި ފުރުޞަތުތައް ދޫކޮށްލަން ޖެހެ އެވެ.

އެގޮތުން ކެޓްރީނާ ވެސް ވަނީ ބޮލީވުޑްގެ ތާރީޚުގައި ރެކޯޑުތައް މުގުރާލި 7 ބްލޮކްބަސްޓާ ފިލްމެއްގެ ރޯލުތައް އެކި ސަބަބުތަކާހުރެ ދޫކޮށްލާފަ އެވެ.

1. ޗެންނާއީ އެކްސްޕްރެސް (2013)

ޝާހްރުކް ޚާންގެ މި ސުޕަރހިޓް ކޮމެޑީ އެކްޝަން ފިލްމުގައި "މީނައްމާ"ގެ ކެރެކްޓާ ކުޅުމަށް އެންމެ ފުރަތަމަ ހުށަހެޅީ ކެޓްރީނާ އަށެވެ. ނަމަވެސް އޭނާ މި ރޯލަށް އިންކާރު ކުރުމުން، ދީޕިކާ ޕަދްކޯންއަށް އެ ރޯލު ކުޅެ، ބޮޑު ތަރުޙީބެއް ހޯދި އެވެ. މިއީ ބޮކްސް އޮފީހުގައި 400 ކްރޯޑަށްވުރެ ގިނަ ރުޕީސް ހޯދި ފިލްމެކެވެ.

2. ބާޖީރާއޯ މަސްތާނީ (2015)

ޑައިރެކްޓަރު ސަންޖޭ ލީލާ ބަންސާލީގެ މި ތާރީޚީ ލޯބީގެ މާސްޓާ ޕީސްއިން "މަސްތާނީ"ގެ ރޯލު އެންމެ ފުރަތަމަ ހުށަހެޅި ތަރިންގެ ތެރޭގައި ކެޓްރީނާ ހިމެނެ އެވެ. ނަމަވެސް ކެޓްރީނާ މި ފިލްމު ދޫކޮށްލުމުން، މި ރޯލުވެސް ދިޔައީ ދީޕިކާ އަށެވެ. މިއީ ދީޕިކާގެ ކެރިއަރުގެ އެންމެ ވަރުގަދަ އެއް ރޯލެވެ.

3. ޔޭ ޖަވާނީ ހޭ ދީވާނީ (2013)

ރަންބީރު ކަޕޫރާއެކު "ނައިނާ" ގެ ސާދާ ކެރެކްޓަރު ކުޅުމުގެ ފުރުޞަތު ކެޓްރީނާއަށް ލިބުނެވެ. ނަމަވެސް، އެ ދުވަސްވަރު އެހެން ފިލްމުތަކެއްގެ މަސައްކަތުގައި އުޅެން ޖެހުމާއެކު ތާރީހުތައް ދިމާ ނުވުމުގެ ސަބަބުން ކެޓްރީނާއަށް މި ފިލްމު ދޫކޮށްލަން ޖެހުނެވެ. ފަހުން މި ރޯލުން ވެސް ފެނުނީ ދީޕިކާ އެވެ.

4. ގޯލިއޯން ކީ ރާސްލީލާ ރާމް-ލީލާ (2013)

ސަންޖޭ ލީލާ ބަންސާލީގެ ފިލްމުތަކަށް ކެޓްރީނާ "ނޫނެކޭ" ބުނި ދެވަނަ ފަހަރަކީ މިއީއެވެ. ރާމް-ލީލާގެ "ލީލާ" ގެ ގަދަފަދަ ގުޖުރާތީ ކެރެކްޓަރުގެ ރޯލު ކެޓްރީނާ ދޫކޮށްލުމުން ބަންސާލީ ވަނީ އެ ރޯލަށް ދީޕިކާ ހަމަޖައްސާފަ އެވެ. މި ފިލްމަކީ ދީޕިކާ އާއި ރަންވީރު ސިންގްގެ ލޯބީގެ ފެށުން ވެސްމެ އެވެ.

5. ބަރްފީ (2012)

ޑައިރެކްޓަރު އަނޫރާގް ބާސޫގެ މި އެވޯޑް ހާސިލުކުރި ފިލްމުން ކެޓްރީނާއަށް ހުށަހެޅީ އިލިއާނާ ޑިކްރޫޒް ކުޅުނު "ޝްރޫތީ"ގެ ރޯލެވެ. ފިލްމުގެ ނެރޭޝަން (ވާހަކަ) ކިޔައިދިން ގޮތާ މެދު ހިތްހަމަނުޖެހިގެން ކެޓްރީނާ މި ފިލްމު ދޫކޮށްލީ އެވެ.

6. ހާފް ގާލްފްރެންޑް (2017)

ޗެޓަން ބަގަތުގެ މަޝްހޫރު ފޮތުގެ މައްޗަށް ބިނާކޮށް އުފެއްދި މި ފިލްމުގެ ބަތަލާގެ ރޯލު އެންމެ ފުރަތަމަ ހުށަހެޅީ ކެޓްރީނާ އަށެވެ. ނަމަވެސް އޭނާގެ އުމުރާ މި ކެރެކްޓަރާ ނުގުޅޭނެ ކަމަށް ނިންމައި ފިލްމު ދޫކޮށްލުމުން، ފަހުން އެ ރޯލު ކުޅުނީ ޝްރައްދާ ކަޕޫރެވެ.

7. ގުންޑޭ (2014)

ޔާޝް ރާޖް ފިލްމްސްގެ "ގުންޑޭ" ގައި ރަންވީރު ސިންގް އަދި އަރްޖުން ކަޕޫރާއެކު ފެންނަ ކެބަރޭ ޑާންސަރު "ނަންދިތާ" ގެ ރޯލު ކުޅެން ކެޓްރީނާއަށް ދައުވަތު ލިބުނެވެ. ނަމަވެސް ކެޓްރީނާ މި ފިލްމަށް އިންކާރު ކުރުމުން، މި ރޯލު ކާމިޔާބު ކަމާއެކު ކުޅުނީ ޕްރިޔަންކާ ޗޯޕްރާ އެވެ.

ކެޓްރީނާ ދޫކޮށްލި މި 7 ފިލްމަކީވެސް ބޮލީވުޑްގެ ތާރީޚުގައި ރަން އަކުރުން ފަވާލެވުނު ބްލޮކްބަސްޓާ ފިލްމު ތަކެކެވެ. ހާއްސަކޮށް މި ފިލްމުތައް ކެޓްރީނާ ދޫކޮށްލުމަކީ، ދީޕިކާބޮލީވުޑްގެ އެއްވަނަ ރާނީގެ މަގާމަށް އައުމަށް ލިބުނު އެންމެ ބޮޑު ހަދިޔާ އެވެ.