ސުލްހައިގެ މަޝްވަރާތަކަށް އެމެރިކާއިން ހުށަހެޅި ހުށަހެޅުމަށް އީރާނުން ދިން ޖަވާބު ގަބޫލުނުކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. މިއާއެކު، އީރާނާއި ލުބުނާނަށް ބޮޑެތި ގެއްލުންތަކެއް ލިބި، ހޮރްމޫޒް ކަނޑުއޮޅީގެ ދަތުރުފަތުރަށް ބުރޫއަރައި، ދުނިޔޭގެ ހަކަތައިގެ އަގުތައް އުފުލިގެން ދިޔަ 10 ހަފުތާވީ ހަނގުރާމަ ނިމުމަކަށް އަތުވެދާނެ ކަމަށް ކުރެވުނު އުންމީދުތައް ވަނީ ފަނޑުވެފަ އެވެ.

އީރާނުގެ ދައުލަތުގެ މީޑިއާއިން ބުނި ގޮތުގައި، މަޝްވަރާތައް އަލުން ފެށުމަށް އެމެރިކާގެ ހުށަހެޅުމަށް ދިން ޖަވާބުގައި އީރާނުން ބާރުއަޅާފައިވަނީ ހުރިހާ ދިމާއަކުން، ހާއްސަކޮށް ލުބުނާނުގައި ކުރާ ހަނގުރާމަ ހުއްޓާލުމަށާއި، ހޮރްމޫޒް ކަނޑުއޮޅީގެ ސަލާމަތާއި ރައްކާތެރިކަން ކަށަވަރު ކުރުމަށެވެ. ނަމަވެސް، އީރާނުގެ މި ހުށަހެޅުން ނެރުނުތާ މަދު ގަޑިއިރުތަކެއްގެ ތެރޭގައި ޓްރަމްޕް ވަނީ ސޯޝަލް މީޑިއާ މެދުވެރިކޮށް އެކަން ބަލައިނުގަންނަކަން ހާމަކުރައްވާފަ އެވެ.

އެމެރިކާއާއި އީރާނާ ދެމެދު އެއްބަސްވުމަކަށް ނާދެވުމާ ގުޅިގެން، ބައިނަލްއަގުވާމީ ބާޒާރުގައި ތެލުގެ އަގު ފީފާއަކުން 3 ޑޮލަރަށް އުފުލިގެން ދިޔައެވެ.

އީރާނުގެ ހުށަހެޅުމުގައި ހަނގުރާމައިގެ ސަބަބުން ލިބުނު ގެއްލުންތަކުގެ ބަދަލު ހޯދުމަށާއި، ކަނޑުއޮޅީގެ މައްޗަށް އޮތް އީރާނުގެ ސިޔާދަތީ ބާރު ކަށަވަރުކުރުމަށް އެދިފައިވާ ކަމަށް އެ ގައުމުގެ މީޑިއާތަކުން ރިޕޯޓުކުރެ އެވެ. މީގެ އިތުރުން، އެމެރިކާއިން ކުރިއަށްގެންދާ ކަނޑުގެ ބްލޮކޭޑް ހުއްޓާލުމަށާއި، ކުރިއަށް އޮތް ތަނުގައި ހަމަލާ ނުދޭނެ ކަމުގެ ޔަގީންކަން ދިނުމަށާއި، ދަތިކުރުމުގެ ފިޔަވަޅުތައް އުވާލައި، އީރާނުގެ ތެޔޮ ވިއްކުން މަނާކޮށްފައި އޮތް އޮތުން ނިމުމަކަށް ގެނައުމަށްވެސް އެ ހުށަހެޅުމުގައި ގޮވާލާފައިވެއެވެ.

އެމެރިކާއިން ކުރިން ހުށަހަޅާފައިވަނީ، އީރާނުގެ ނިއުކްލިއާ ޕްރޮގްރާމް ފަދަ މުހިއްމު މައްސަލަތަކާ މެދު މަޝްވަރާ ފެށުމުގެ ކުރިން ހަނގުރާމަ ހުއްޓާލުމަށެވެ. ވޯލް ސްޓްރީޓް ޖާނަލް އިން ރިޕޯޓުކޮށްފައިވާ ގޮތުގައި، އީރާނުން ހުށަހަޅާފައިވަނީ އެ ގައުމުގައި ހުރި މަތީ ދަރަޖައަކަށް ފައްކާކޮށްފައިވާ ޔުރޭނިއަމްގެ ބައެއް މަދުކުރުމަށާއި، ބާކީ ހުރި ބައި ތިންވަނަ ގައުމަކަށް ބަދަލުކުރުމަށެވެ.

މި މަޝްވަރާތަކުގައި މެދުވެރިއެއްގެ ދައުރު އަދާކުރާ ޕާކިސްތާނުގެ އޮފިޝަލަކު ވިދާޅުވި ގޮތުގައި، އީރާނުގެ ޖަވާބު އެމެރިކާއަށް ފޯރުކޮށްދިނީ އެ ގައުމުންނެވެ. ހަނގުރާމަ މެދުކަނޑާލާފަ އޮންނަތާ މަހެއްހާ ދުވަސްވެ، ފާއިތުވި 48 ގަޑިއިރު މަސްލަހަތު ކޮންމެވެސް ވަރަކަށް ރަނގަޅުވި ނަމަވެސް، އާދީއްތަ ދުވަހު ގަލްފުގެ ބައެއް ގައުމުތަކުގެ މަތިން ނުރައްކާތެރި ޑްރޯންތަކެއް ފެނުމުން، ސަރަހައްދަށް އޮތް ނުރައްކާ އަދިވެސް އޮތްކަން ވަނީ ހާމަވެފަ އެވެ.

ނަމަވެސް، ފެބްރުއަރީ 28 ގައި އެމެރިކާއާއި އިޒްރޭލުން ހަނގުރާމަ ފެށި ފަހުން، ގަތަރު އެނާޖީން އޮޕޭޓްކުރާ އެލްއެންޖީ އުފުލާ ފުރަތަމަ އުޅަނދު "އަލް ޚަރައިތިއްޔާތު" ވަނީ ރައްކާތެރިކަމާއެކު ހޮރްމޫޒް ކަނޑުއޮޅި ހުރަސްކޮށް ޕާކިސްތާނުގެ ޕޯޓް ގާސިމަށް ދަތުރުކޮށްފަ އެވެ. މިއީ ހަނގުރާމަ ފެށި ފަހުން، ގަތަރުގެ ގުދުރަތީ ގޭސް އުފުލާ އުޅަނދެއް އެ ކަނޑުއޮޅި ހުރަސްކުރި ފުރަތަމަ ފަހަރެވެ.

ރިޕޯޓުތައް ބުނާ ގޮތުގައި، ގޭސް އެތެރެކުރުން ހުއްޓުމުގެ ސަބަބުން ކަރަންޓު ކެނޑުމުގެ ބޮޑެތި މައްސަލަތަކާ ކުރިމަތިލާން ޖެހިފައިވާ ޕާކިސްތާނަށް މި ދަތުރުގެ ސަބަބުން ކޮންމެވެސް ވަރެއްގެ ލުޔެއް ލިބިގެންދާނެ އެވެ. މި ދަތުރަކީ ޕާކިސްތާނާއި، މެދުވެރިއެއްގެ ދައުރު އަދާކުރާ ގަތަރާއެކު އިތުބާރު އުފެއްދުމުގެ ގޮތުން އީރާނުން ހުއްދަ ދީގެން ކުރިއަށްދިޔަ ދަތުރެކެވެ. މީގެ އިތުރުން، ބްރެޒިލަށް ދަތުރުކުރި ޕެނަމާގެ ދިދަ ޖެހި އުޅަނދެއްވެސް އީރާނުގެ އަސްކަރިއްޔާއިން ކަނޑައަޅާފައިވާ މަގަކުން ކަނޑުއޮޅި ހުރަސްކޮށްފައިވާ ކަމަށް ރިޕޯޓުތައް ބުނެއެވެ.

ޗައިނާގެ ދަތުރުގެ ކުރިން ހަނގުރާމަ ނިންމުމަށް ޓްރަމްޕަށް ބާރުބޮޑުވަނީ

ރައީސް ޓްރަމްޕް މި ހަފުތާގައި ޗައިނާއަށް ކުރައްވާ ދަތުރުފުޅާ ދިމާކޮށް، ދުނިޔޭގެ އިގްތިސާދަށް ނުރައްކާވަމުންދާ މި ހަނގުރާމަ ނިމުމަކަށް ގެނައުމަށް އޭނާއަށް އަންނަނީ ބޮޑެތި ފިއްތުންތަކެއް ކުރިމަތިވަމުންނެވެ. ދުނިޔޭގެ ތެލުގެ ފަސްބައިކުޅަ އެއްބައި އުފުލާ ހޮރްމޫޒް ކަނޑުއޮޅީގެ ދަތުރުފަތުރު އީރާނުން ވަނީ ބޮޑު ބައެއް ބަންދުކޮށްފަ އެވެ.

އީރާނާ ދެކޮޅަށް ކުރާ އަސްކަރީ އޮޕަރޭޝަންތައް ނިމުނީތޯ ސުވާލުކުރުމުން ޓްރަމްޕް ވިދާޅުވީ، އެމީހުން ބަލިވެއްޖެ ކަމަށާއި އެކަމަކު އޭގެ މާނައަކީ އެމީހުންގެ މަސައްކަތް ހުއްޓާލީއެކޭ ނޫން ކަމަށެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، އީރާނުގެ ޔުރޭނިއަމް ފައްކާކުރާ ތަންތަން ނައްތާލުމާއި، އީރާނުގެ މަދަދުލިބޭ ޖަމާއަތްތަކާއި މިސައިލް ގާބިލްކަން ކުޑަކުރުމަށް އަދިވެސް ގިނަ މަސައްކަތްތަކެއް ކުރަން ހުރި ކަމަށެވެ. ނަމަވެސް ބާރުގެ ބޭނުންކުރުމުގެ އިތުރުން، ޑިޕްލޮމެސީގެ ބޭނުންކުރުމަކީވެސް އޮތް ފުރުސަތެއް ކަމަށް އޭނާ ވިދާޅުވި އެވެ.

އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ، އީރާނުން ދުވަހަކުވެސް ދުޝްމަނުންގެ ކުރިމަތީގައި އިސްނުޖަހާނެ ކަމަށާއި، ގައުމީ މަސްލަހަތު ދިފާއުކުރުމުގައި ސާބިތުވެ އޮންނާނެ ކަމަށެވެ.

ދާދި ފަހުން ޔޫއޭއީ، ގަތަރު އަދި ކުވެއިތުން ވަނީ އެ ގައުމުތަކުގެ ވައިގެ ސަރަހައްދުން ނުރައްކާތެރި ޑްރޯންތަކެއް ހުއްޓުވާފަ އެވެ. ހަމައެއާއެކު، އެމެރިކާ މެދުވެރިވެގެން އެޕްރީލް 16 ގައި އިއުލާންކުރި ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފަށް، އިޒްރޭލާއި ހިޒްބުالله ޖަމާއަތާ ދެމެދު ލުބުނާނުގެ ދެކުނުގައި ކުރިމަތިލުންތައް އަދިވެސް ދަނީ ކުރިއަށެވެ.

ބައިނަލްއަގުވާމީ މިޝަނަކަށް ތައްޔާރުވުމާ ގުޅިގެން އީރާނުން އިންޒާރުދެނީ

ދިރާސާތަކުން ދައްކާ ގޮތުގައި، އެމެރިކާގެ ކޮންގްރެސް އިންތިހާބަށް ހަ މަސްދުވަހަށް ވުރެ ކުޑަތަންވެފައި ވަނިކޮށް، ތެލުގެ އަގު އިންތިހާއަށް އުފުލުމުގެ ސަބަބުން މި ހަނގުރާމައަކީ އެމެރިކާގެ ވޯޓުލާ މީހުންގެ މެދުގައި ވަރަށް މަގުބޫލުކަން ކުޑަ ހަނގުރާމައެކެވެ. މީގެ އިތުރުން، ސުލްހައިގެ ފުރިހަމަ އެއްބަސްވުމަކާ ނުލައި އަދި ބައިނަލްއަގުވާމީ ގޮތުން ހުއްދަދީފައިވާ މިޝަނަކާ ނުލައި ހޮރްމޫޒް ކަނޑުއޮޅި ހުޅުވުމަށް މަނަވަރުތައް ފޮނުވަން ނޭޓޯގެ އެކުވެރި ގައުމުތަކުން ދެކޮޅު ހަދަމުންދާތީ، މިކަމުގައި އެމެރިކާއަށް ބައިނަލްއަގުވާމީ ތާއީދު އޮތީ ވަރަށް ކުޑަކޮށެވެ.

އެމެރިކާގެ ސިޔާސީ މައިދާނުގައި، "ވޯ ޕަވާސް އެކްޓް" މެދުވެރިކޮށް ހަނގުރާމަ ހުއްޓުވުމަށް ކޮންގްރެސްގެ ޑިމޮކްރެޓުން ކުރަމުންދާ މަސައްކަތްތަކާ ކުރިމަތިލާން ޓްރަމްޕަށް ވަނީ މަޖުބޫރުވެފަ އެވެ.