ޑިމާންޑާ އެއްވަރަށް އައްޑޫ ސިޓީއަށް ދަތުރުކުރާ ފްލައިޓުތައް އިތުރުނުކުރާތީ އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން ކަންބޮޑުވުން ފާޅުކުރައްވައިފި އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އަބްދުއްރަހްމާން ވިދާޅުވީ މޯލްޑިވިއަން ފްލައިޓްތަކުން ‏އައްޑުއާއި މާލެއާއި ދޭތެރޭ ދަތުރުކުރަން މިފަހަކަށް އައިސް އެއްގޮތަކަށް ވެސް ޖާގައެއް ނުލިބޭ ކަމަށެވެ. ފްލައިޓްތަށް އިތުރު ނުކުރެވޭއިރު، އެހެން ބަޔަކަށް އުދުހުމުގެ ފުރުސަތެއް ވެސް ނުދޭ ކަމަށް އޭނާ ތުހުމަތުކުރެއްވި އެވެ.

އޭނާ ވިދާޅުވި ގޮތުގައި ޑިމާންޑާ އެއްވަރަށް ދަތުރު ބޭއްވުމުގެ ގާބިލުކަން ސަރުކާރު އަދި މޯލްޑިވިއަންގައި ނެތްނަމަ އެހެން ބަޔަކަށް އުދުހުމުގެ ފުރުސަތު ދޭން ޖެހޭނެއެވެ.

"އައްޑު އާއި މާލެއާ ދޭތެރޭ ދަތުރުކުރަން މިފަހަކަށް އައިސް އެއްގޮތަކަށް ވެސް މޯލްޑިވިއަން ފްލައިޓުން ޖާގައެއް ނުލިބޭ، ފްލައިޓްތަށް އިތުރެއް ނުކުރެވޭ، ނުކުރެވޭތާގައި އެހެން ބަޔަކަށް އުދުހުމުގެ ފުރުސަތެއްނުދޭ،" އަބްދުއްރަހްމާން ވިދާޅުވި އެވެ.

އައްޑޫއަށް ދަތުރުކުރާ ފްލައިޓްތައް މަދުވުމުގެ ސަބަބުން އީދަށް މަޑުކުރަން ބޭނުން އެތައްބަޔަކު ޖާގަ ނުލިބުމުން އީދުގެ ކުރިން ފުރަން ޖެހިފައިވާ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވީ ޑިމާންޑާއި އެއްވަރަށް ދަތުރު ބޭއްވުމުގެ ގާބިލްކަން ސަރުކާރު އަދި މޯލްޑިވިއަންގައި ނެތްނަމަ އެހެން ބަޔަކަށް އުދުހުމުގެ ފުރުސަތު ދޭން ޖެހޭ ކަމަށާއި މޮނޮޕޮލީއެއް ގޮތަށް މޯލްޑިވިއަން އިން އައްޑޫ ރައްޔިތުން ފެލާ ހިތުހުރި އެއްޗެއް ހަދަނީ ސަރުކާރުން ކަމަށެވެ.

"ފްލައިޓްތަކުގެ ދަތިކަން މިހާއޮންނައިރު މި ބޭފުޅުން އަމިއްލަ ދޯންޏަކަށް ހަދާ ގޮތަށް ކެމްޕޭން ދަތުރަށް ބޯޓުތަކުގެ ޝެޑިއުލް މި ބޭފުޅުންގެ ކޮންވިނިއަންސަށް އެބަ ބަދަލުކުރޭ، މިހެން ހެދުމުން އެންމެ ބޮޑު ގެއްލުމެއް ލިބެނީ ކަނެކްޓިން ފްލައިޓްތަކަށް އަރަން ތިބި މީހުންނަށް. ފްލައިޓް ލަސް އެބަކުރޭ ވަޒީރާއި މެންބަރު ފެންވަރާ ނިމެންދެން. މީޓިން ނިމެންދެން. ކޮފީ ނިމެންދެން،" އޭނާ ވިދާޅުވި އެވެ.

އަބްދުއްރަހްމާން ވިދާޅުވީ މި ސަރުކާރަށް ވެރިކަމާއި މަޖިލިސް ދިނުމުން މިހާރު ޑިމާންޑުކުރަމުންދަނީ ކައުންސިލްތައް ދިނުމަށް ކަމަށްވާއިރު، މި ސަރުކާރަށް އައްޑޫގައި ހެދުނީ ޑްރޯން ބޭސްއެއް ކަމަށެވެ.

މި ވެރިކަމަށް ދެ އަހަރު ވެގެންދިޔައިރު އައްޑޫއަށް ދިން އިސްކަމެއް ނެތްކަން ފާހަގަކުރައްވާ އަބްދުއްރަހްމާން ވިދާޅުވީ ސަރުކާރުން ރައްޔިތުން ގަމާރުންނަށް ނަހަދައި ވައުދުތައް ފުއްދައިދޭންޖެހޭ ކަމަށެވެ

މޯލްޑިވިއަންގެ ފްލައިޓުތަކާ ގުޅިގެން އަބްދުއްރަހްމާން މި ކަންބޮޑުވުން ފާޅުކުރެއްވިއިރު، އެ އެއާލައިނުން ދަތުރުކުރާ އެތެރޭގެ މަންޒިލުތަކުގެ ތެރެއިން އެންމެ ގިނައިން ދަތުރުކުރާ މަންޒިލަކީ އައްޑޫ ސިޓީ އެވެ.