"ހުރިހާ"އިން މި ރޯދަ މަހު ގެނެސްދޭ ރޯދައިގެ ސުވާލާއި ޖަވާބު ސެގްމެންޓަކީ ރަމަޟާން މަހުގެ އަޅުކަމާ ގުޅުވައިގެން އުފެދޭ ބައެއް އާއްމު ސުވާލުތަކަށް ޖަވާބު ހޯދައިދިނުމެވެ. މި ސެގްމެންޓްގައި ގެނެސްދޭ ސުވާލުތަކާއި އޭގެ ޖަވާބުތަކަކީ ދީނީ އިލްމުވެރިއެއް ކަމަށްވާ އާސިމް އަލް ހަކީމް ގެ ދީނީ ދަރުސްތަކުންނާއި ވީޑިއޯތަކުން ނަގާފައިވާ މައުލޫމާތެވެ.

އަހަރުމެންގެ ތެރޭގައި އެކި ބަލިތަކަށް ފަރުވާކުރާ މީހުން އުޅޭއިރު އޭގެ ތެރޭގައި ދުވާލުގެ ވަގުތުތަކުގައި ނޭފަތަށް ބޭސް އަޅަންޖެހޭ މީހުން ވެސް ހިމެނެ އެވެ.

ސުވާލު: ނޭފަތަށް ބޭސް އެޅުމުން ރޯދަ ގެއްލޭނެތަ؟

ޖަވާބު: ކީރިތި ރަސޫލާ މުހައްމަދުއް ސައްލަﷲ އަލައިހި ވަސައްލަމްގެ ހަދީޘްފުޅެއްގައި ވާ ގޮތުން ވުޟޫ ކުރުމުގައި ނޭފަތާއި އަނގަ ސާފު ކުރުމަށް ހާއްސަ ސަމާލުކަމެއް ދޭންޖެހެ އެވެ. އެއީ އެ މީހަކު ރޯދައަށް ހުންނަ ދުވަހެއްގައި މެނުވީ އެވެ.

މިކަމުން ދޭހަވާ ކަމަކީ ނޭފަތުން ނަމަވެސް އަރުގެ ތެރެއަށް އެއްޗެއް ގޮސްފިނަމަ އެކަމުން އެމީހެއްގެ ރޯދަ ގެއްލޭނެ ކަމެވެ. އެއީ ނޭފަތަކީ ހަޖަމުކުރާ ނިޒާމާ ގުޅިފައިވާ ގުނަވަނަކަށް ވާތީ އެވެ.

އެހެން ކަމުން ރަމަޟާން މަހު ދުވާލުގެ ވަގުތު ރޯދައަށް ހުރެގެން ނޭފަތަށް ބޭސް އަޅައިފިނަމަ އެމީހެއްގެ ރޯދަ އެ ހިސާބުން ގެއްލޭނެ އެވެ.