ސްރީލަންކާގެ ދެކުނު އައްސޭރިފަށުން ބޭރުން އެމެރިކާގެ ސަބްމެރީނަކުން އީރާނުގެ އަސްކަރީ މަނަވަރަކަށް ހަމަލާދީ ފައްތާލުމާ ގުޅިގެން ގިނަ އަދަދެއްގެ ފަޅުވެރިން މަރުވެއްޖެ އެވެ.

ސްރީލަންކާގެ ޑެޕިއުޓީ ފޮރިން މިނިސްޓަރު ވިދާޅުވި ގޮތުގައި، މި ހަމަލާ އަމާޒުވި "އައި.އާރު.އައި.އެސް ދެނާ" ނަމަކަށް ކިޔާ ފްރިގޭޓް މަނަވަރަކީ، އިންޑިއާގެ އިރުމަތީ ބަނދަރަކުން ފުރައިގެން އަނބުރާ އީރާނަށް ދަތުރުކުރަމުންދިޔަ އުޅަނދެކެވެ.

މި ހަމަލާ ދީފައިވަނީ ގަލްފް ސަރަހައްދާ އެތައް ސަތޭކަ މޭލެއް ދުރުން އިންޑިއާ ކަނޑުގެ ތެރޭގަ އެވެ. ގަލްފް ސަރަހައްދަކީ އެމެރިކާ އާއި އިޒްރޭލުގެ ފައުޖުތަކުން އީރާނަށް ހަމަލާދެމުންދާ، އަދި އީރާނުން މިސައިލާއި ޑްރޯން ބޭނުންކޮށްގެން ރައްދު ހަމަލާދެމުންދާ ސަރަހައްދެވެ. ހަނގުރާމަ ފުޅާވެ އިންޑިއާ ކަނޑާ ހަމައަށް ފޯރުމުން ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.

ޕެންޓަގަންގައި ވާހަކަދައްކަވަމުން އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވީ، ބައިނަލްއަގުވާމީ ކަނޑުގެ ސަރަހައްދުގައި ރައްކާތެރިކަމާއެކު އޮތް ކަމަށް އީރާނުން ހީކުރި މަނަވަރު، އެމެރިކާގެ ސަބްމެރީނަކުން ދިން ޓޯޕީޑޯ ހަމަލާއެއްގައި ފައްތާލާފައިވާ ކަމަށެވެ.

ސްރީލަންކާގެ ބަނދަރުމަތީ ރަށެއް ކަމަށްވާ ގޯލްގެ ހޮސްޕިޓަލްގެ އޮފިޝަލުން ބުނި ގޮތުގައި، ފަތިހުގެ ވަގުތެއްގައި ލިބުނު އެހީއަށް އެދޭ ކޯލަކާ ގުޅިގެން ހިންގި ސަލާމަތީ އޮޕަރޭޝަނުގައި 87 މީހެއްގެ ހަށިގަނޑު ވަނީ ހޮސްޕިޓަލަށް ގެނެސްފަ އެވެ.

ސްރީލަންކާގެ ކަމާބެހޭ ފަރާތްތަކުން ހާމަކުރި ގޮތުގައި، އިތުރު 32 މީހަކު ސަލާމަތްކުރެވި ހޮސްޕިޓަލުގައި ފަރުވާދެމުންދާއިރު، މަނަވަރުގައި ތިބި ކަމަށް ބެލެވޭ 180 މީހުންގެ ތެރެއިން ގާތްގަނޑަކަށް 60 މީހަކު އަދިވެސް ނުފެނެ އެވެ.

މި ހަމަލާގެ މަންޒަރުތައް ކަމަށް ބުނެ ޕެންޓަގަނުން އާންމުކުރި ވީޑިއޯއަކުން ފެންނަ ގޮތުގައި، ބާރުގަދަ ގޮވުމަކާއެކު މަނަވަރުގެ ފަހަތުކޮޅު ވަނީ ވަކިވެފަ އެވެ. އަދި އޭގެ ސަބަބުން މަނަވަރު ވަނީ ފަހަތުކޮޅުން އަޑިއަށް ދާން ފަށާފަ އެވެ.

މި ވީޑިއޯ ނަގާފައިވާ ސީދާ ތާރީޚާއި މަނަވަރުގެ ބާވަތް ކަށަވަރު ކުރެވިފައި ނުވި ނަމަވެސް، ވީޑިއޯއިން ފެންނަ މަނަވަރުގެ ބައްޓަމާއި ރާޑަރު ތަނބުތަކަކީ "އައި.އާރު.އައި.އެސް ދެނާ" މަނަވަރާ އެއްގޮތް ސިފަތަކެކެވެ.

މި މަނަވަރަކީ ފެބްރުއަރީ 18 އިން 25 އަށް ބޭންގަލް ކަނޑުއޮޅީގައި އިންޑިއާއިން އިންތިޒާމުކޮށްގެން ބޭއްވި އަސްކަރީ ތަމްރީނުތަކުގައި ބައިވެރިވި މަނަވަރެކެވެ.

ސްރީލަންކާގެ ކަނޑުގެ ސިފައިންގެ ތަރުޖަމާނު ކޮމާންޑަރު ބުއްދިކަ ސަމްޕަތު ވިދާޅުވީ، ހާދިސާ ހިނގި ސަރަހައްދަށް ދިޔަ އުޅަނދުތަކަށް ފެނުނީ ހަމައެކަނި ކަނޑުގެ ސަތަހައިގައި ހުރި ތެޔޮތަކެއް ކަމަށެވެ. އަދި މި ހާދިސާ ހިނގާފައިވަނީ ސްރީލަންކާގެ ކަނޑުގެ ސަރަހައްދުން ބޭރުގައި ނަމަވެސް، އެހީތެރިކަން ފޯރުކޮށްދިނުމުގައި ކޮލަމްބޯއިން ދެމިއޮންނާނެ ކަމަށް އޭނާ ވިދާޅުވި އެވެ.

މަރުވި މީހުންގެ ހަށިގަނޑުތައް ހުދު ފޮތިގަނޑުތަކުން ނިވާކޮށް، ލޮރީއެއްގައި ގޯލްގެ ކަރަޕިޓިޔާ ހޮސްޕިޓަލަށް ގެންގޮސް ވަނީ މޯޗަރީއަށް ލާފައެވެ.

ރޮއިޓާސްއަށް މައުލޫމާތު ދިން ސްރީލަންކާގެ ދެ މަސްދަރަކުން ބުނި ގޮތުގައި، ސަލާމަތްވި މީހުންގެ ތެރޭގައި މަނަވަރުގެ ކޮމާންޑަރާއި ބައެއް އިސް އޮފިސަރުން ހިމެނެ އެވެ. އެމީހުން ބުނި ގޮތުގައި މަނަވަރަށް ހަމަލާދީފައިވަނީ ސަބްމެރީނަކުންނެވެ.

އިންޑިއާއިން ކޮންމެ ދެ އަހަރަކުން އެއްފަހަރު ބާއްވާ "މިލާން" ކަނޑުގެ އަސްކަރީ ތަމްރީނުތަކުގައި "އައި.އާރު.އައި.އެސް ދެނާ" ބައިވެރިވިކަން އެ ތަމްރީނުގެ ވެބްސައިޓުން ކަށަވަރު ވެއެވެ.

އިންޑިއާގެ އީސްޓަން ނޭވަލް ކޮމާންޑުން ފެބްރުއަރީ 17 ވަނަ ދުވަހު އެކްސް (ކުރީގެ ޓްވިޓާ) ގައި ކުރި ޕޯސްޓެއްގައި، ދެ ގައުމުގެ ދެމެދުގައި އޮތް ސަގާފީ ގުޅުން ރަމްޒުކޮށްދޭ ގޮތުން އީރާނުގެ މި މަނަވަރަށް މަރުހަބާ ކިޔާފައި ވެއެވެ. ނަމަވެސް، މަނަވަރު ފައްތާލި ހާދިސާއާ ގުޅިގެން އިންޑިއާގެ ކަނޑުގެ ސިފައިންގެ ތަރުޖަމާނު އަދި އެއްވެސް އެއްޗެއް ވިދާޅެއް ނުވެއެވެ.