ހިޔާ ފުލެޓްތައް ކުއްޔަށް ދިނުން ހުއްޓުވަން ގާނޫނު އިސްލާހުކުރުމުގެ މަސައްކަތް މިހާރު ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުالله މުއްތަލިބު މިއަދު ވިދާޅުވެއްޖެ އެވެ.

ބޯހިޔާވަހިކަމަށް އެންމެ ބޭނުންޖެހިފައިވާ މީހުންނަށް ދައުލަތުން ހެޔޮ އަގުގައި ދޫކުރާ ސޯޝަލް ހައުސިން ފުލެޓުތައް، ބޮޑު އަގުގައި އެހެން މީހުންނަށް ކުއްޔަށް ދިނުމުގެ މައްސަލަ މި ފަހުން ވަނީ ބޮޑުވެފައެވެ. އެގޮތުން ބޮޑު އާބާދީއެއް އޮންނަ ހިޔާ ފުލެޓާއި، މިދިޔަ އަހަރުތެރޭ ހަވާލުކުރަން ފެށި، ފަހި ދިރިއުޅުން ކޯޕަރޭޝަން (އެފްޑީސީ)ގެ ފުލެޓުތައް ވެސް ކުއްޔަށް ދިނުމުގެ ޝަކުވާތައް ވަނީ އިތުރުވެފަ އެވެ.

މިކަމާ ގުޅިގެން ނޫސްވެރިންނަށް މައުލޫމާތު ދެއްވަމުން މުއްތަލިބު ވިދާޅުވީ، ހިޔާ ފްލެޓްތައް ދޫކުރަން ހަދައިފައިވާ އެއްބަސްވުމުގެ ދަށުން، އެ ފުލެޓުތައް ކުއްޔަށް ދިނަސް ދައުލަތަށް އަތުލެވޭނެ ގޮތެއް މިހާރު ނެތް ކަމަށެވެ. އެހެންނަމަވެސް ސޯޝަލް ހައުސިން ސްކީމްތައް ހިންގާ އުސޫލުތަކާއި ސިޔާސަތުތަކަށް ބަލާއިރު، އެގޮތަށް ފުލެޓް ކުއްޔަށް ދިނުމަކީ ކުރެވޭނެ ކަމެއް ނޫން ކަމަށް އޭނާ ވިދާޅުވި އެވެ.

އެހެންވެ، އެއްބަސްވުން އޮތަސް، ފިޔަވަޅު އެޅޭނެ ގޮތެއް ހެދުމަށް ޓަކައި ގާނޫނު އިސްލާހު ކުރަން ޖެހޭކަން ފާހަގަކުރައްވައި މުއްތަލިބު ވިދާޅުވީ މިކަމަށް ގާނޫނެއް ހެދިފައި ނެތުމުން ކުއްޔަށް ދިނުމަކީ މަނާކަމެއް ކަމަށް ގާނޫނުން ކަނޑައަޅަން މަސައްކަތް ކުރާ ކަމަށެވެ.

މިދިޔަ އޮކްޓޫބަރު މަހު، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާއި އެފްޑީސީން ވަނީ، ކުއްޔަށް ދޫކޮށްފައިވާ ސޯޝަލް ހައުސިން ފުލެޓްތައް ހޯދުމުގެ މަސައްކަތް ފަށައިފައިވާ ކަމަށް ބުނެފަ އެވެ.

މުއްތަލިބު ވިދާޅުވީ އެޗްޑީސީން އާންމުކޮށް އަންގަމުން ނުދާ ނަމަވެސް، ބިދޭސީންނަށް ލޭބާ ކުއާޓާސްގެ ގޮތުގައި ދީފައިވާ ފުލެޓުތައް ހޯދައި، ނޯޓިސް ދިނުމުގެ މަސައްކަތް އެ ކުންފުނިން ކުރިއަށްގެންދާ ކަމަށެވެ.

"މި ވަގުތަށް ސަރުކާރުން ދެ ކަމެއް ކުރަނީ، އެއީ އެ ތަންތަނުގައި އުޅޭ ރައްޔިތުންނަށް އުނދަގޫވާ ކަންތައްތައް ހުއްޓުވުން، ދެވަނަ ކަމަކީ ގާނޫނަށް ބަދަލު ގެނެސްގެން ކުއްޔަށް ދިނުމަކީ މަނާ ކަމެއް ކަމަށް ކަނޑައެޅުން،" މުއްތަލިބު ވިދާޅުވިއެވެ.

އޭނާ ވަނީ، އެފްޑީސީ ފުލެޓުތައް ކުއްޔަށް ދޭ ކަމުގެ ރިޕޯޓެއް ލިބިއްޖެ ނަމަ، ވަގުތުން ފިޔަވަޅު އަޅާނެ ކަމަށް ވެސް ވިދާޅުވެފަ އެވެ.

އެފްޑީސީން އެޅި 4،000 ފުލެޓު ހަވާލުކުރަން ފެށީ މިދިޔަ ސެޕްޓެންބަރު މަހެވެ. ނަމަވެސް، ހަވާލުކުރަން ފެށިތާ ކުޑަ ދުވަސްކޮޅެއް ފަހުން، 10،500 ރުފިޔާއަށް ކުއްޔަށް ދޭ ތިން ކޮޓަރީގެ އެޕާޓްމަންޓެއް 25،000 ރުފިޔާއަށް ކުއްޔާ ދޫކުރާ ކަމަށް ބުނާ އިޝްތިހާރެއް ސޯޝަލް މީޑިއާގައި އާންމުވިއެވެ. އަދި ގިނަ ބަޔެއްގެ ފާޑުކިޔުން އަމާޒުވި އެވެ.