2022 ވަނަ އަހަރު ގަތަރުގައި ބޭއްވި ފީފާ ވޯލްޑް ކަޕްގެ ތެރޭގައި ޓީވީ މެދުވެރިކޮށް ދެއްކި ޖުވާ ނުވަތަ ބެޓް ކުރުމުގެ އިޝްތިހާރުތަކުގެ ސަބަބުން މީހުން ބެޓް ކުރުމަށް ބޮޑު ނުފޫޒެއް ފޯރުވާފައިވާ ކަމަށް ހޯދުންތަކާ ހަވާލާދީ މީޑިއާ ރިޕޯޓުތަކުން ބުނެފި އެވެ.

މި ހޯދުންތަކާ ގުޅިގެން، މިއަހަރު ބޭއްވުމަށް ހަމަޖެހިފައިވާ ބޮޑެތި ކުޅިވަރު މުބާރާތްތަކުގެ ކުރިން ކަމާބެހޭ ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ.

ޔުނިވާސިޓީ އޮފް ޝެފީލްޑްގެ އެކަޑެމިކް ޓީމަކުން ކުރިއަށް ގެންދިޔަ މި ދިރާސާއިން އެނގުނު ގޮތުގައި، ޖުވާގެ އިސްތިހާރުތައް ކޮންޓްރޯލް ކުރުމަށް މިހާރު ކަނޑައަޅާފައިވާ ގަވާއިދުތަކަކީ މިކަމުގެ ނުރައްކާ އެންމެ ބޮޑަށް އޮތް މީހުން ރައްކާތެރިކުރުމަށް އެންމެ އެކަށޭނަ ގަވާއިދުތަކެކެވެ.

މި ދިރާސާގައި ހާއްސަކޮށް ބަލާފައިވަނީ އިންގްލެންޑްގެ އުމުރުން 18 އަހަރާއި 45 އަހަރާ ދެމެދުގެ ފިރިހެނުންގެ މެދުގައި ބެޓް ކުރުމުގެ އާދަތައް ހުރި ގޮތަށެވެ.

ދިރާސާގެ ނަތީޖާތަކުން ދައްކާ ގޮތުގައި، ޖުވާގެ އިޝްތިހާރުތައް ދައްކާ ޗެނަލްތަކުން މެޗުތައް ބެލި މީހުން ބެޓް ކުރި މިންވަރު، އެފަދަ އިސްތިހާރުތައް ނުދައްކާ ޗެނަލްތަކުން މެޗު ބެލި މީހުންނާ އަޅާބަލާއިރު 16 އިންސައްތައާއި 24 އިންސައްތައާ ދެމެދުގެ މިންވަރަކަށް އިތުރެވެ.

މީގެ އިތުރުން، ޓީވީން ޖުވާގެ އިސްތިހާރުތައް ފެނުމުން ބެޓް ކުރުމުގެ ފުރުސަތު 22 އިންސައްތައާއި 33 އިންސައްތައާ ދެމެދުގެ މިންވަރަކަށް އިތުރުވާކަން ވެސް ވަނީ ފާހަގަކުރެވިފަ އެވެ.

ދިރާސާގެ މުސައްނިފުން ފާހަގަކުރި ގޮތުގައި، މި ދިރާސާގައި ބައިވެރިވި މީހުންނަކީ މީގެ ކުރިން ޖުވާގެ މައްސަލަތައް ކުރިމަތިވެފައިވާ ބައެއް ނޫން ނަމަވެސް، 18 އަހަރާއި 44 އަހަރާ ދެމެދުގެ ފިރިހެނުންނަކީ އިނގިރޭސިވިލާތުގައި އެންމެ ގިނައިން ކުޅިވަރުތަކަށް ބެޓް ކުރާ އަދި މިކަމުގެ ސަބަބުން ލިބޭ ގެއްލުންތަކަށް އެންމެ ބޮޑަށް ހުށަހެޅިފައިވާ ގުރޫޕެވެ.

ދިރާސާވެރިންގެ ބަސް މި ދިރާސާގެ އިސް މުސައްނިފު އެލެން މެކްގްރޭން ވިދާޅުވީ، މި ޓީވީ އިސްތިހާރުތަކަކީ ލައިވް މެޗުތަކުގެ ތެރޭގައި މީހުން ބެޓް ކުރުމަށް ހިތްވަރުދޭ ވަރުގަދަ ބާރަކަށް ވެގެންދާ އެއްޗެއް ކަމަށާއި މީގެ ސަބަބުން ކުރިން ބެޓް ކުރުމުގެ އެއްވެސް ނިޔަތެއް ނެތް މީހުން ވެސް ޖުވާ ކުޅެން ފަށާކަން ފާހަގަކުރެވޭ ކަމަށެވެ.

އޭނާ އިތުރަށް ފާހަގަކުރެއްވި ގޮތުގައި، މި އިސްތިހާރުތަކުގެ ސަބަބުން ހަމައެކަނި އެއް ޕްލެޓްފޯމުން އަނެއް ޕްލެޓްފޯމަށް މީހުން ބަދަލުވަނީއެއް ނޫނެވެ.

އޭގެ ބަދަލުގައި، މުޅި ޖުމްލަކޮށް މުޖުތަމައުގައި ޖުވާ ކުޅޭ މިންވަރު މިކަމުގެ ސަބަބުން އަންނަނީ އިތުރުވަމުންނެވެ. މި ހޯދުންތަކާއެކު، ކުރިއަށް އޮތް ބޮޑެތި ކުޅިވަރު މުބާރާތްތަކުގައި މިފަދަ އިޝްތިހާރުތައް ރެގިއުލޭޓް ކުރުމުގެ މުހިންމުކަން ވަނީ އިތުރުވެފަ އެވެ.