ހަފްތާއެއްގެ ތެރޭގައި ދެވަނަ ފަހަރަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ އޮފީސް ފަޅާލައިފި އެވެ.

ފުލުހުން ބުނީ އިއްޔެ ހަވީރު 4:30 ހާއިރު އާރްޑީސީގެ އޮފީސް ފަޅާލައި 3،000 ރުފިޔާ ވަގަށް ގެންގޮސްފައިވާ ކަމަށެވެ.

މޯލްޑިވްސް ޝިޕިން ލިމިޓެޑްގެ އިމާރާތުގައި ހުންނަ އާރްޑީސީގެ އޮފީސް ފުރަތަމަ ފަޅާލީ މިދިޔަ ހޮނިހިރު ދުވަހުގެ ހެނދުނު 10:00 ގަ އެވެ. އެފަހަރު 100،000 ރުފިޔާ ވަގަށް ނަގާފައިވެ އެވެ. އެއީ އެ އޮފީހުގެ ތިޖޫރީގައި ހުރި ފައިސާ އެވެ.

މިކަމާ ގުޅިގެން އާރްޑީސީން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.

މި މައްސަލައާ ގުޅިގެެން މިހާތަނަށް އެއްވެސް މީހަކު ހައްޔަރުކުރި ކަމެއް އަދި ވަގަށްނެގި ފައިސާ ހޯދުނުކަން ނުވަތަ ނޫންކަން ފުލުހުން ހާމަކޮށްފައެއް ނުވެ އެވެ.