ވަގުތު ގިނަވުމަކީ ގިނަ މަސައްކަތް ކުރުމުގެ ހިތްވަރު އާވާ ކަމެކެވެ. ޚާއްސަކޮށް އެމީހެއްގެ ކިބައިގައި ގިނަ ހުނަރުތަކެއްވާ ނަމަ ހުސް ވަގުތަކަށް ބަލައިލަ ބަލައި ހުރެވެ އެވެ.
މި ހުނަރުވެރިޔާއަކީ ކޮވިޑްގެ ލޮކްޑައުންގައި، ގޭގައި ހުރެ އެކަނިވެރިކަމާއި ފޫހިކަން އިހްސާސްވި ދުވަސްތަކުގައި، އޭނާގެ ހުނަރު ކޮޅަށް ޖެހި ޒުވާނެކެވެ. އެތައް ބައެއްގެ ކުޅު ދިޔާކޮށްލި ހުނަރުވެރި ކެއްކުންތެރިއެކެވެ. ރަސްމީ މަސައްކަތް ކުރަމުން ވެސް ހުސް ވަގުތެއް ލިބިއްޖެ ނަމަ މިއަދު ވެސް އޭނާ އެންމެ ގަޔާވާ ތަނަކީ ބަދިގެ ކަން ބުނެލަނީ ހިނިތުންވެލާފަ އެވެ.
ބ. ކުޑަރިކިލަށް އުފަން ސާއިގާ ޝާހިދު (ސޯތު) ކުރިއަށް ދިޔައީ ސިއްހީ ރޮނގުންނެވެ. އޭނާއަކީ ބަލި މީހުންނަށް އޯގާތެރި ހީވާގި ނަރުހެކެވެ. ޚިދުމަތަށް ގޮވާލި ކޮންމެ ވަގުތަކު ވެސް އޭނާ ހުންނަނީ އެކަމަށް ތައްޔާރަށެވެ. މިވަގުތު ވެސް އޭނާ ހުރީ ކުޑަރިކިލު ސިއްހީ މަރުކަޒުގައި ނަރުހެއްގެ ވަޒީފާގަ އެވެ. ގާތްގަނޑަކަށް 13 އަހަރު ޚިދުމަތުގައި ހޭދަކުރިއިރު ސޯތު ވަނީ ނާސިންގެ ދާއިރާއިން ކުރިއަށް ދިއުމަށް ގިނަ މަސައްކަތްތަކެއް ކޮށްފަ އެވެ. އެގޮތުން 2023 ގައި ވިލާ ކޮލެޖްގައި އެޑްވާންސް ޑިޕްލޮމާއިން ނާސިން ހާސިލްކޮށްފަ އެވެ. އަދި މިހާރު ވެސް ދަނީ ވިލާ ކޮލެޖްގައި ނާސިން ދާއިރާއިން ޑިގްރީއަށް ކިޔަވަމުންނެވެ.
ކުޅިވަރުގައި ވެސް އޭނާއަކީ ފާހަގަކޮށްލެވޭ ޒުވާނެކެވެ. ވަޒީފާ އަދާކޮށްފައި ލިބޭ ހުސް ވަގުތުތަކުގައި ކުރާ ކަސްރަތެއްގެ ގޮތުން އެއިރެއްގައި މީހުން އެންމެ ގިނައިން ކުޅޭ ކުޅިވަރެއް ކުޅުމަށް އޭނާ ލޯބިކުރެ އެވެ. އެގޮތުން ބަށި، ވޮލީ، ނެޓް ބޯޅަ، ހޭންޑް ބޯލް އަދި ފުޓްސަލްއަކީ އޭނާ ގިނައިން ކުޅޭ ކުޅިވަރުތަކެވެ. މިހާތަނަށް އޭނާ ވަނީ ރަށު ފެންވަރުގެ އެކި ކުޅިވަރުތައް ކުޅެފަ އެވެ.
ވަޒީފާއިން މިންޖުވުމަށް ފަހު ކަސްރަތަށް ވަގުތު ކޮޅެއް ހުސްކޮށްފައި މީހުންގެ އަނގަޔަށް މީރު ރަހަލައްވައި ދިނުމަށް އޭނާ ހުންނަނީ ކެތްމަދުވެފަ އެވެ.
ސޯތު ކެއްކުމަށް ހިތްޖެހުނީ އޭނާގެ މަންމަ އަދި ދޮންތަ ކައްކާ ތަން ފެނިގެންނެވެ. އަބަދު ވެސް މަންމައަށް އަތްގާތް ކޮށްދީ ހެދުމުގެ ނަތީޖާއަކަށްވީ، ކެއްކުމަށް ޚާއްސަ ލޯތްބެއް އޭނާގެ ހިތުގައި އުފެދުނެވެ. އޭނާ ތައްޔާރުކުރާ ކާތަކެއްޗަށް އޭނާގެ ފިރިމީހާގެ ފަރާތުން ވެސް ވަރަށް ގިނައިން ތައުރީފުގެ ބަސްތައް ލިބޭކަން އުފަލާއެކު ފާހަގަކުރެ އެވެ.
މުޅި ދުނިޔެއަށް ކޮވިޑްގެ ވަބާ ފެތުރި، ރާއްޖެ ލޮކްޑައުންއަށް ދިޔަ ދުވަސްވަރަކީ އޭނަގެ ކެއްކުމުގެ ހުނަރު އެހެން މީހުންނަށް ދައްކާލަން ލިބުނު ރަނުގެ ފުރުސަތެއް ކަމުގައި ގަބޫލުކުރި އެވެ. އަދި އެކަމުން ކުރިއަށް ދިޔައީ ފިސާރި ކެރިހުރެ އެވެ.
"ލޮކްޑައުންގައި ފޫހިވެގެން އުޅުނުއިރު ފުރަތަމަ އޮންލައިންކޮށް ކޭކު، ކުކިން އަދި ޕޭސްޓްރީ ކޯސްތަކެއް ހެދީ. އޭގެ ސަބަބުން ލިބުނު އާ މައުލޫމާތުގެ މައްޗަށް ބިނާކޮށް އާ ރެސިޕީ ހަދަން ފެށިން. އަދި މަންމަ އާއި ދޮންތަގެ އެހީއާއެކު ވިޔަފާރިއަށް އެ މަސައްކަތް ކުރަން ފެށިން،" ކުޑަރިކިލުގައި ބޭއްވި ކޭކް ޑިޕްލޮމާ ކޯހެއް ވެސް ފުރިހަމަ ކޮށްފައިވާ ސޯތު ކިޔައިދިނެވެ.
"ރޯސްބަދިގެ"ގެ ނަމުގައި އޭނާ ޓިކްޓޮކްގައި ހުޅުވި ޕޭޖަށް ބޮޑު ތަރުހީބެއް ލިބިގެން ދިޔަ އެވެ. މިއަދު ވެސް ހުސްވަގުތު ވާވަރަކުން ވީޑިއޯތަކާއި ރެސިޕީތައް ހިމެނުމަށް އޭނާ އިސްކަމެއްދެ އެވެ. ވީޑިއޯ ހެދުމާއި އެޑިޓް ކުރުމުގައި އެންމެ ބޮޑު އެހީތެރިކަމެއް ވެދެނީ އޭނާގެ ދަރިފުޅެވެ.
"އަޅުގަނޑު ކާއެއްޗެހި ތައްޔާރު ކުރާއިރު ދަރިފުޅު ކުރިން ވެސް ބުނާނެ މަންމާ ހިނގާށޭ ވީޑިއޯ ހަދަން . އޭރު އެފަދަ ކަމެއް ކުރުމުގެ ޝައުގުވެރިކަމެއް ނުހުރޭ. އެހެން އުޅެނިކޮށް އެއް ދުވަހަކު ހިތަށް އެރީ ވީޑިއޯއެއް ހަދާލާނީއޭ އެހެން ހިތާ ހެދީ. ފުރަތަމަ ހެދި ވީޑިއޯއަށް އަޑުއެޅީ އަޅުގަނޑުގެ ދައްތަގެ ދަރިފުޅު. އެ ވީޑިއޯއަށް ވަރަށް ބޮޑު ތަރުހީބެއް ލިބިގެން ދިއުމަކީ މިޕޭޖް ކުރިއަށް ގެންދިއުމަށް ލިބުނު އެންމެ ބޮޑު ހިތްވަރު،" ފެހުމުގެ މަސައްކަތަށް ވެސް މޮޅު ސޯތު ކިޔައިދިނެވެ.
ކުޑަރިކިލުގެ އާބާދީ ކިތަންމެ ކުޑަނަމަވެސް، އޭނާ އުފައްދާ ކެއުންތަކަށް ބޮޑު ތަރުހީބެއް އޭރު ވެސް އަދި މިހާރު ވެސް ލިބެ އެވެ. އޭގެ ހެއްކަކީ ކޮންމެ ދުވަހަކު ވެސް ތައްޔާރު ކުރާ ކާތަކެތި ހުސްވުމެވެ. ޚާއްސަކޮށް އޭނަ ތައްޔާރު ކުރާ ޕާސްތާ، ބަޓާ ޗިކަން، ތަފާތު ވައްތަރުގެ ކޭކް، މަސްބަނަސް، ކުކުޅު ބަނަސް އަދި ސަބްމެރިންއަށް ކޮންމެ ދުވަހަކު ވެސް ހުސްވާ ކަމަށް އޭނާ ބުންޏެވެ.
އޭރު އެ މަސައްކަތް ވަރަށް ވައިގަ ހިފި ނަމަވެސް ފަހުން އެމަސައްކަތް ކުރެވުނީ ވަކި ވަގުތުތަކެއްގަ އެވެ. އެއީ ލޮކްޑައުން ނިމުމާއެކު އާންމު ހާލަތަށް ދިރުއުޅުން ބަދަލުވެ، ވާޒީފާގައި ގިނަ ވަގުތު ހޭދަކުރަން ޖެހުމުންނެވެ. އޭގެ ސަބަބުން ކެއްކުމުގެ މަސައްކަތަށް ކުޑަ ހީނަރުކަމެއް ވެސް އަ އެވެ. މިއަދު އެ މަސައްކަތް ކުރަނީ ހަމައެކަނި ހަފުތާ ބަންދުގަ އާއި ރޭގަނޑުގައި ލިބޭ ހުސް ވަގުތުތަކުގަ އެވެ.
"މި މަސައްކަތުގައި ހުރި އެންމެ ބޮޑު ދައްޗަކީ ބޭނުންވާ ތަކެތި މި ރަށުން ނުލިބުން. މިސާލަކަށް ކުކުޅު، ޗީޒް، ބަޓާ އަދި ކުކިން ކްރީމް ފަދަ ތަކެތި ވަރަށް އަގުބޮޑު މިކޮޅުން ގަންނަންޏާ. އެހެންވެ މާލެއިން ނުވަތަ އޭދަފުށިން އެތަކެތި ގަނޑުކޮށް ގަންނަނީ،" އޭނާގެ ހުރި ކަންބޮޑުވުމެއް ހިއްސާ ކޮށްލަމުން ބުންޏެވެ.
އޭނާގެ މަސައްކަތަށް ކަސްޓަމަރުންނާއި ފިރިމީހާގެ ފަރާތުން ލިބޭ ތައުރީފުގެ ބަސްތަކަކީ އެ މަސައްކަތް ކުރިއަށް ގެންދިއުމަށް ލިބޭ އެންމެ ބޮޑު ބާރެވެ. އެންމެ ބޮޑު ހިތްހަމަޖެހުމެވެ. އޭގެ އިތުރުން އެންމެ ގާތް އެކުވެރިޔާ އާއި، އާއިލާ އަދި ރައްޓެހިންގެ ފަރާތުން ލިބޭ ހިތްވަރާއި އެހީތެރިކަމަށް އޭނާ ވަރަށް ލޯތްބާއެކު ޝުކުރު އަދާކުރެ އެވެ.
ލިބޭ ހުސްވަގުތަކީ ރަނގަޅު ގޮތުގައި ބޭނުންކޮށްފި ނަމަ، ކުރިއެރުމެކެވެ. ސޯތު ތަފާތު ހުނަރެއް ކުރިއަރުވައި އެވަނީ އެކަން ސާބިތު ކޮށްދީފަ އެވެ.