މޯލްޑިވިއަނުން އިނގިރޭސިވިލާތާއި، އިޓަލީ އަދި ޖަރުމަނަށް ދަތުރުތައް ފަށަން ޕެސެންޖާ ސޭލްސް އެޖެންޓުން ހޯދަން އިއުލާންކޮށްފި އެވެ.

ވައިގެ ދަތުރުފަތުރުގެ ހިދުމަތްދޭ ސަރުކާރުގެ ކުންފުނިން ބުނީ މި ތިން ގައުމުގައި މޯލްޑިވިއަންގެ އެޖެންޓުންނަށްވުމުގެ ފުރުސަތު އަންނަ މަހުގެ 5 ވަނަ ދުވަހާ ހަމައަށް ހުޅުވާލާފައިވާ ކަމަށެވެ.

މޯލްޑިވިއަނުން ބުނީ އެއާބަސް އޭ 330-200ގެ ވައިޑް-ބޮޑީ މަތިންދާ ބޯޓު ރާއްޖެ ގެނެސް އެ ގައުމުތަކަށް ދަތުރު ފެށުމަށް ތައްޔާރުވަމުން އަންނަ ކަމަށެވެ.

މޯލްޑިވިއަނުން ބުނީ ރާއްޖެ ގެންނަ ފުރަތަމަ ވައިޑް- ބޮޑީ މަތިންދާބޯޓު އަންނަ މަހުގެ ފަހުކޮޅު ރާއްޖެ އަންނާނެ ކަމަށެވެ. އަދި އަންނަ އަހަރުގެ ކުރީކޮޅު ޚިދުމަތް ދޭން ފެށޭނެ ކަމަށް އުންމީދުކުރާ ކަމަށް އެ ކުންފުނިން ބުނެ އެވެ.

މޯލްޑިވިއަނުން ގެންނަނީ 268 މީހުންގެ ޖާގައިގެ ވައިޑް-ބޮޑީ މަތިންދާބޯޓެކެވެ.

މޯލްޑިވިއަނުން މިހާރު ބައިނަލްއަގުވާމީ ދަތުރުތައް ކުރަނީ އިންޑިއާގެ ތިން ސިޓީއަކަށާއި ބަންގްލަދޭޝްގެ ޑާކާއަށެވެ.