މަޖީދީ މަގާއި ސޯސަންމަގު ގުޅޭ ހަތަރު އަނގޮޅި ކަންމަތީގައި ހުންނަ ހ. ސަންގުރޭޒްގެ ފުރަތަމަ ފަންގިފިލާގައި އަލިފާން ރޯވީ އަވަނެއް އޯވާ ހީޓްވެގެން ކަމަށް އެމްއެންޑީއެފް އިން ބުނެފި އެވެ.

އެމްއެންޑީއެފްއިން ބުނީ އަލިފާނުގެ ހާދިސާއާ ގުޅިގެން ބިދޭސީއަކު އެތަނުން ނިކުންނަން އުޅުމުގެ ތެރޭގައި ފައި ހަލާކުވެގެން އޭޑީކޭގައި ފަރުވާ ދެމުން އަންނަ ކަމަށެވެ. އަދި ދުމުގެ އަސަރުކޮށްގެން ދުވަސްވީ ދެ މީހުންނަށް އެ ހޮސްޕިޓަލުގައި ފަރުވާދެމުން އަންނަ ކަމަށް އެމްއެންޑީއެފް އިން ބުންޏެވެ.

މިއަދު އިރުއޮއްސެން އުޅެނިކޮށް ހިނގި އެ ހާދިސާގައި ގެއްލުން ލިބުނު މީހުންނަށް އެހީވުމުގައި ދިވެހި ރެޑްކްރޮސެންޓް ވެސް ވަނީ ހަރަކާތްތެރިވެފަ އެވެ.

އެމްއެންޑީއެފްގެ ފަޔާ އެންޑް ރެސްކިޔު ސާވިސްގެ ފަޔާ ފައިޓަރުން އަލިފާން ނިއްވާލާފައި ވަނީ 06:23 ހާއިރު އެވެ.