ރާއްޖޭގައި މިހާރު ފެތުރެމުންދާ ހިމަބިހި (މީސްލްސް)ގެ ކޭސްތަކުގެ އަދަދު 121 އަށް އަރައިފި އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ހާމަކުރި ގޮތުގައި، މިދިޔަ ހަފުތާގެ ތެރޭގައި އެކަނިވެސް މާލެ ސަރަހައްދުން މި ބަލީގެ 55 އާ ކޭސް ވަނީ ފެނިފަ އެވެ. މިއާއެކު މި އަހަރުގެ މިހާތަނަށް ރިޕޯޓްކުރި ޖުމްލަ ކޭސްތަކުގެ އަދަދު މިހާރު ވަނީ 121 އަށް އަރާފަ އެވެ.

ރާއްޖެއިން ހިމަބިހި މުޅިން ނައްތާލާފައިވާ ކަމަށް 2017 ވަނަ އަހަރު ކަނޑައެޅި ފަހުން ވެސް ބިދޭސީންގެ ފަރާތުން މި ބަލި ފެނުނު ނަމަވެސް، މިފަހަރު ހާލަތު ސީރިއަސްވެގެން ދިޔައީ ދިވެހިންގެ ތެރޭގައި ބަލި ހަލުވިކަމާއެކު ފެތުރެން ފެށުމުންނެވެ.

ބަލި ކޮންޓްރޯލް ކުރުމަށްޓަކައި އެޗްޕީއޭ އިން ފެށި ހާއްސަ ޕްރޮގްރާމެއްގެ ދަށުން މިހާތަނަށް 5,495 މީހަކަށް ވަނީ އެމްއާރު ވެކްސިން ދީފަ އެވެ. މާލެ ސަރަހައްދުގައި މި ވެކްސިން ފޯރުކޮށްދެނީ އާބަން ޕްރައިމަރީ ހެލްތު ކެއާ (ޔޫޕީއެޗްސީ) އާއި، ހުޅުމާލެ ހޮސްޕިޓަލާއި، ސެނެހިޔާގެ އިތުރުން ވިލިމާލެ ހޮސްޕިޓަލުންނެވެ.

ކުޑަކުދިންގެ ހާއްސަ ޑޮކްޓަރު އަހުމަދު ފައިސަލް ވިދާޅުވި ގޮތުގައި، މިހާރު ފެނުނު ކޭސްތަކުގެ ތެރެއިން ބަލިޖެހުނީ އެންމެ ހަތަރު ކުޑަކުދިންނަށެވެ. ބަލީގެ އަސަރު އެންމެ ބޮޑަށް ކޮށްފައިވަނީ އުމުރުން 15 އަހަރާއި 35 އަހަރާ ދެމެދުގެ ޒުވާނުންނަށެވެ. މީގެ ހަތަރު އަހަރު ކުރިން، 2022 ވަނަ އަހަރުގެ ތަފާސްހިސާބުތަކަށް ރިއާޔަތްކުރައްވައި ޑޮކްޓަރު ފާހަގަކުރެއްވީ، ބަލި އެންމެ ގިނައިން ޖެހެނީ ވެކްސިން ނުޖަހާ ތިބޭ މީހުންނަށް ކަމަށާއި، ކޭސްތައް އިތުރު ވަނީ ވެކްސިންގެ ޑޯޒްތައް ފުރިހަމަނުކޮށް ތިބޭ އާބާދީ ބޮޑުވުމުން ކަމަށެވެ.

ހަމައެއާއެކު ބަލި ފެތުރުން ހުއްޓުވުމަށްޓަކައި އެޗްޕީއޭ އިން ވަނީ ރައްކާތެރިކަމުގެ ހަރުކަށި އިރުޝާދުތަކެއް ނެރެފަ އެވެ. އެގޮތުން ހުން އައިސް ގައިގައި ރަތް ބިހިތަކެއް ނަގައިފިނަމަ ލަސްނުކޮށް މާސްކް އަޅައިގެން ހޮސްޕިޓަލަށް ދިއުމަށާއި، ބައްޔަށް ޝައްކުވެގެން ޓެސްޓް ހަދައިފިނަމަ ނަތީޖާ ލިބެންދެން އެކަހެރިވެގެން ތިބުމަށް ވަނީ އަންގާފަ އެވެ. އަދި ބަލީގެ އެއްވެސް އަލާމާތެއް ހުރިނަމަ، މީހުން އެއްވެ އުޅޭ ތަންތަނަށް ނުދިއުމަށް އެޗްޕީއޭ އިން ބާރުއަޅަ އެވެ.