ކޮފީއަކީ ހަމައެކަނި ހެނދުނު ހޭލުމަށް ނުވަތަ ވަރުބަލި ފިލުވުމަށް ބޯލާ ބުއިމެއް ނޫނެވެ. މިއީ ފުރަމޭގެ ދިފާއުގައި މަސައްކަތްކުރާ ވަރުގަދަ ބާރެއްކަން އެންމެ ފަހުގެ ބޮޑު ދިރާސާއަކުން މިހާރު ވަނީ ސާބިތުވެފަ އެވެ.

ސައިންސްވެރިން ހާމަކުރި ގޮތުގައި، ދުވާލަކު ބޯލާ ކޮފީ ތަށީގެ ސަބަބުން ފުރަމޭގެ ބަލިތަކާއި ފުރަމޭގެ ކެންސަރު ޖެހުމުގެ ފުރުސަތު ވަރަށް ބޮޑަށް ދަށްކޮށްދެ އެވެ.

ކްލިނިކަލް ގެސްޓްގޮއެންޓެރޮލޮޖީ އެންޑް ހެޕަޓޮލޮޖީ ޖާނަލްގައި ޝާއިއުކޮށްފައިވާ މި ދިރާސާގައި، 354,000 އަށްވުރެ ގިނަ މީހުންގެ ސިއްހީ ހާލަތު 10 އަހަރަށްވުރެ ދިގު މުއްދަތަކަށް ވަނީ ޗެކޮށްފަ އެވެ. މިއީ ކޮފީގެ ސަބަބުން ފުރަމޭއަށް ކުރާ އަސަރު ދެނެގަތުމަށް މިހާތަނަށް ހެދި އެންމެ ފުރިހަމަ އެއް ދިރާސާ އެވެ.

ކޮފީ ބޯ މިންވަރުން ލިބޭ ރައްކާތެރިކަން

މި ދިރާސާއިން އެނގުނު ގޮތުގައި ކޮފީ ބޯ މިންވަރު އިތުރުވީ ވަރަކަށް ފުރަމޭއަށް ލިބޭ ރައްކާތެރިކަން ވެސް އިތުރުވެ އެވެ. ނުބޯ މީހުންނާ އަޅާބަލާއިރު:

  • ދުވާލަކު 1 ނުވަތަ 2 ތަށި ކޮފީ: ސިރޯސިސް (ފުރަމޭ ހަލާކުވުން) ޖެހުމުގެ ފުރުސަތު 20 ޕަސެންޓް ދަށްވެ އެވެ. އަދި ފުރަމޭގެ ކެންސަރު ޖެހުމުގެ ފުރުސަތު 24 ޕަސެންޓް ކުޑަވެ އެވެ.
  • ދުވާލަކު 5 ނުވަތަ އެއަށްވުރެ ގިނަ ތަށި ކޮފީ: ސިރޯސިސް ޖެހުމުގެ ފުރުސަތު 32 ޕަސެންޓް ދަށްވާއިރު، ފުރަމޭގެ ކެންސަރު ޖެހުމުގެ ފުރުސަތު 47 ޕަސެންޓް އަށްވުރެ ބޮޑަށް ކުޑަކޮށްދެ އެވެ. އަދި ފުރަމޭގެ ބަލިތަކުގައި މަރުވުމުގެ ފުރުސަތު 42 ޕަސެންޓް ދަށްކޮށްދެ އެވެ.

ސިއްރަކީ ކެފެއިންއެއް ނޫން!

މި ދިރާސާއިން ފާހަގަވި އެންމެ ހައިރާން ކުރުވަނިވި ކަމަކީ، އާދައިގެ ކޮފީ ބޯ މީހުންނާއި "ޑިކެފް" ކޮފީ ބޯ މީހުންނަށް ވެސް މި ފައިދާ އެއްވަރަކަށް ލިބޭ ކަމެވެ. ދިރާސާގެ އިސް މުސައްނިފު، ލޮސް އެންޖެލިސްގެ ސީޑާސް-ސައިނައި މެޑިކަލް ސެންޓަރުގެ ޑޮކްޓަރު ހިޔުންސިއޯކް ކިމް ވިދާޅުވި ގޮތުގައި، ފުރަމޭއަށް މި ބޮޑު ފައިދާ ލިބެނީ ކޮފީގައި ހުންނަ ކެފެއިންގެ ސަބަބުންނެއް ނޫނެވެ.

އޭގެ ބަދަލުގައި މިއީ ކޮފީގައި އެކުލެވޭ އެންޓިއޮކްސިޑެންޓްސްއާއި ދުޅަހެވުމާ ދެކޮޅަށް މަސައްކަތްކުރާ މާއްދާތަކުގެ ސަބަބުން ލިބޭ ފައިދާ އެކެވެ.

އެމް.އާރް.އައި ސްކޭންތަކުން ދެއްކި ގޮތުގައި، ގަވާއިދުން ކޮފީ ބޯ މީހުންގެ ފުރަމޭގައި ސަރުބީ ހުންނަ މިންވަރު އެ ނޫން މީހުންނާ އަޅާ ބަލާއިރު މަދެވެ. އަދި ފުރަމޭ ދުޅަވުމާއި ހަލާކުވުމުން ރައްކާތެރިކޮށްދެ އެވެ.

ސިއްހީ މާހިރުންގެ ލަފާ

ޑޮކްޓަރުން ވިދާޅުވާ ގޮތުގައި ކޮފީއަކީ ފުރަމޭގެ ބަލިތަކަށް ފަރުވާއެއް ނޫނެވެ. ނަމަވެސް، ސިއްހީ ގޮތުން ކޮފީ ބުއިމަށް ހުރަހެއް ނެތް މީހުންނަށް، މިއީ ފުރަމޭގެ ދިފާއުގައި އާދަ ކުރެވިދާނެ ވަރަށް އަގުހެޔޮ އަދި ފަސޭހަ ކަމެކެވެ.

އެހެންނަމަވެސް، ކޮފީ ބޯއިރު ގިނަ އަދަދަކަށް ހަކުރާއި ކްރީމް އެޅުމަކީ އޭގެ ސަބަބުން ބަރުދަން އިތުރުވެ، ފުރަމޭއަށް ގެއްލުން ވެދާނެ ކަމެއްކަމަށް ސަމާލުވާންޖެހެ އެވެ. އެހެންކަމުން އެންމެ ފައިދާހުރި ގޮތަކީ ކޮފީ ކަޅުކޮށް ނުވަތަ ހަކުރު މަދުކޮށް ބުއިމެވެ.