ކާނާ ލިބުން ދަތިވެ ޣައްޒާގައި ކުޑަކުދިން މަރުވަމުންދާ އަދަދު ވަރަށްބޮޑަށް އިތުރުވެއްޖެކަމަށް ޣައްޒާ ސިޓީގެ ސިއްހީ ވުޒާރާއިން ހާމަކޮށްފިއެވެ.

ޣައްޒާގެ ސިއްހީ ވުޒާރާއިން ބުނީ ކާބޯތަކެތި ލިބުން ދަތިވުމާ ގުޅިގެންނާއި ރަނގަޅުކާނާ ނުލިބުމުގެ ސަބަބުން މިފަހުން ޣައްޒާއިން 322 މީހަކު މަރަުވެފައިވާ ކަމަށެވެ. މީގެ ތެރޭގައި 121 ކުޑަކުދިން ހިމެނޭކަމަށް ވެސް އެ ވުޒާރާއިން ބުނެ އެވެ.

ކާނާ ލިބުން ދަތިވުމާ ގުޅިގެން ހުކުރު ދުވަހު ވެސް ޣައްޒާގެ ތުއްތު އަންހެން ކުއްޖަކުވަނީ ދުނިޔެދޫކޮށްފަ އެވެ. އިސްރާއީލްގެ އަމަލުތަކުގެ ސަބަބުން ޣައްޒާގައި ބަނޑުހައިހޫނުކަން ކާރިސާއަކަށް ބަދަލުވެގެން ގޮސްފައިވާއިރު، ޣައްޒާގެ ވަށައިގެންވާ ސަރަހައްދުތަކުގެ ހާލަތުވެސް ވަރަށް ގޯސްވެފައިވާކަމަށް އަލްޖަޒީރާއިން ވަނީ ބުނެފަ އެވެ.

އިސްރާއީލުން ޣައްޒާ ވަށާލައި ކާބޯތަކެތި ވެއްދުމަށް ހުރަސްތައް ކުރިމަތިކުރުވަމުންދާއިރު، ޔަހޫދީ ސިފައިން ބުނެފައިވަނީ ހަމާސްއިން އަމާންދިނުމުން ނޫނީ ޣައްޒާ ހިފުމަށް ހިންގަމުންގެންދާ ޖަރީމާތައް ހުއްޓާނުލާނެ ކަމަށެވެ.

އިސްރާއީލުން މިފަހުން ޣައްޒާއަށް ދޭންފެށި ހަމަލާތަކުގައި 62,895 އަށްވުރެ ގިނަ މީހުން ޝަހީދުވެފައިވާއިރު، 158,927 އަށްވުރެ ގިނަ މީހުން ވަނީ ޒަހަމްވެފަ އެވެ.