ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ސަސްޕެންޑް ކުރި ވެރިންތަކެއް އަދިވެސް ތިބީ މަގާމުން އެކަހެރިކޮށްފައި ކަމަށް އެ ކޯޕަރޭޝަނުން ބުނެފި އެވެ.

މުއްދަތެއް ނެތް ގޮތަށް ސަސްޕެންޑުކޮށްފައިވަނީ އެ ކޯޕަރޭޝަނުގެ ލީގަލް ޑިޕާޓުމެންޓުގެ ވެރިޔަކަށް ހުންނެވި ޑރ. ފާތުމަތު ޝިއުނީ އާއި ޗީފް ޕްލޭނިން އޮފިސަރަކަށް ހުންނެވި އަހުމަދު ޒިނަފު އަދި ޗީފް ހިއުމަން ރިސޯސަސް އޮފިސަރު މުހައްމަދު އިލްހާމެވެ.

މަގާމުގެ ޒިންމާތަކުން ދުރުކުރިޔަސް އެ މީހުން އަދިވެސް އޮފީހަށް ނުކުމެ، މުސާރަ ވެސް ހިނގި ނަމަވެސް މަގާމުތަކާ ގުޅޭ އެއްވެސް ޒިންމާއެއް އެ މުވައްޒަފުން އަދާނުކުރާކަން ވަނީ ހާމަވެފަ އެވެ.

މައުލޫމާތު ދިން ފަރާތުން ބުނީ، ވަޒީފާގެ ޒިންމާތަކުން އެކަހެރި ކުރި ކަމަށް އެ ބޭފުޅުންނަށް އަންގާފައިވާކަމަށާއި، އެއްވެސް ސަބަބެއް ނޭނގޭ ކަމަށެވެ.

"އީމެއިލް ވެސް އަދި އޮފީހަށް ވަންނަ އެކްސެސް ވެސް ވަނީ ކަނޑާލާފައި، އެމީހުންނަށް އޮފީސް އިމާރާތުގެ ތެރެއަށް ވެސް އަދި ނުވަދެވޭނެ އަމިއްލަ އަކަށް، އެމީހުންނަށް ވާންވީ ގޮތެއް ވެސް އަދި ނޭނގޭ، ކަނޑާލި ކަމެއް އަދި ޔަގީނެއް ނޫން،" މައުލޫމާތު ދިން ފަރާތުން ބުންޏެވެ.

ސަސްޕެންޑުކުރި އެޗްޑީސީގެ ތިން ވެރިންގެ އިތުރުން އެޗްއާރުގެ ޑިރެކްޓަރަކާއި އެ ޑިޕާޓްމެންޓުގެ އެސިސްޓެންޓު ޑިރެކްޓަރެއް ވެސް ސަސްޕެންޑުކުރިއިރު، އަދިވެސް އިތުރު ފަރާތްތަކަށް ފިޔަވަޅު އަޅަން މެނޭޖްމަންޓުން ރާވާފައިވާ ކަމަށް މައުލޫމާތު ދިން ފަރާތުން ބުނެ އެވެ.