އިޒްރޭލުގެ އަސްކަރިއްޔާއިން އީރާނުގެ ނިއުކްލިއާ އަދި އަސްކަރީ މަރުކަޒުތަކަށް އެތައް ސަތޭކަ ވައިގެ ހަމަލާތައް ދީފައި ކަމަށް ބުނެފި އެވެ.

އީރާނުގެ ދައުލަތުގެ މީޑިއާއިން ބުނީ އިޒްރޭލުން މިފަހަރު މަދުވެގެން ފަސް ރާޅެއްގެ ހަމަލާތަކެއް ދީފައިވާ ކަމަށެވެ. މިގޮތުން ދިން ހަމަލާތަކުގެ އަދަދު އެތައް ސަތޭކައަށް އަރާނެ ކަމަށް ލަފާކުރެ އެވެ.

ހަމަލާދިން ތަންތަނުގެ ތެރޭގައި ހިމެނެނީ:

  • ވެރިރަށް ތެހެރާނާއި ކައިރީގައިވާ އަސްކަރީ ތަންތަން
  • އީރާނުގެ ޕްރައިމަރީ ޔުރޭނިއަމް ފައްކާކުރާ މަރުކަޒު ހުންނަ ނަޓާންޒް ސިޓީ
  • ތެހެރާނުގެ ހުޅަނގު އުތުރުގައި އޮންނަ ތަބްރީޒް ސިޓީ
  • ނިއުކްލިއާ ރިސާޗް ސެންޓަރަކާއި ދެ އަސްކަރީ މަރުކަޒެއް ކައިރީގައި ބޮން ގޮއްވާލާފައިވޭ
  • ތެހެރާނުގެ ދެކުނުގައި އޮންނަ އިސްފަހާން ސިޓީ
  • ހުޅަނގު ދެކުނުގައި ވާ އަރާކް ސިޓީ
  • ތެހެރާނުގެ ހުޅަނގުގައި އޮންނަ ކެރްމަންޝާހް ސިޓީ

އީރާނުގެ ނިއުކްލިއާ މަރުކަޒުތަކަށް އިޒްރޭލުން ދޭ ހަމަލާތަކުގެ ސަބަބުން އީރާނަށް ބޮޑު ހިތްވަރެއް ލިބި، އެ ސަރަހައްދު ބޮޑު ހަމަނުޖެހުންތަކަކަށް ވެއްޓިދާނެ ކަމަށް ތަޖުރިބާކާރުން އަންނަނީ އިންޒާރު ދެމުންނެވެ.

އިޒްރޭލާއި އީރާނާ ދެމެދު ބޮޑު ހަމަނުޖެހުމެއް އުފެދިއްޖެ ނަމަ، އެކަމުގައި އެމެރިކާ ބައިވެރިވުމުގެ ފުރުސަތު އެބައޮތެވެ. ސަބަބަކީ އެމެރިކާއަކީ އިޒްރޭލުގެ އެންމެ ގާތް އެކުވެރިޔާ އަދި ހަތިޔާރު ސަޕްލައިކުރާ އެންމެ ބޮޑު ގައުމަށް ވާތީ އެވެ.

އެ ހަމަލާގެ އިންޒާރުތައް މި ހަފުތާގެ ކުރީކޮޅު ދޭން ފެށުމުން މެދުއިރުމަތީގެ އެކި ސަރަހައްދުތަކުން ބޭނުމެއް ނެތް މުވައްޒަފުން ނެރެން އެމެރިކާއިން ނިންމި އެވެ.

އިޒްރޭލުގެ އޮފިޝަލުން ހުކުރު ދުވަހު ބުނީ އީރާނުގެ ބަދަލު ހިފުމުގެ ފުރުސަތު އޮތް ކަމަށާއި އެކަމަށް ދަނީ ތައްޔާރުވަމުންނެވެ. އަދި މުޅި ގައުމުގައި ކުއްލި ނުރައްކަލުގެ ހާލަތު އިއުލާނުކޮށްފައިވާ ކަމަށް ވެސް ބުނެ އެވެ.

އިޒްރޭލުގެ ހަމަލާތަކުގެ ސަބަބުން އެ ސަރަހައްދު ނުރައްކާތެރި ހާލަތަކަށް ގެންދިއުމުން އިޒްރޭލާއި މެދުއިރުމަތީގެ އެކި ކަންކޮޅުތަކުގައި ދިރިއުޅޭ މީހުންގެ މެދުގައި ވަނީ ބިރުވެރިކަން އުފެދިފަ އެވެ.